Prezidente Konsellu Kombatente Libertasaun Nasionál (CCLN-sigla portugés), Vidal de Jesus "Riak Leman". Imajen TATOLI/Osória Marques.

DILI, 09 marsu 2022 (TATOLI)—Prezidente Konsellu Kombatente Libertasaun Nasionál (CCLN-sigla portugés), Vidal de Jesus “Riak Leman”, informa veteranu grau 8-14 nia oan sira mak bele hetan bolsa estudu hosi programa Governu nian hodi fó bolsa estudu ba veteranu nia oan sira iha Timor-Leste.

Notisia Relevante: Governu Altera Atribuisaun Bolsa Estudu Ba Veteranu Nia Oan Sira

“Ema ida atu hetan bolsa estudu ne’e tenke veteranu nia oan no nia aman mós tenke veretanu ida ho grau 8-14 ba leten. Kuandu 8-14 mai kraik, sira labele simu tanba ita foti bazea ba dekretu-lei ne’ebé iha,” Vidal de Jesus ‘Riak Leman’ hateten ba Agência TATOLI via telefónika, kuarta ne’e.

Agora daudaun, nia dehan, prosesu la’o tiha ona dezde loron 21 fevereiru no iha loron 22 marsu termina ona tanba hela semana rua hanesan ne’e atu taka ona, no ekipa identifikasaun nafatin esforsu hodi bele hetan estudante veteranu nia oan to’o ema 100 kada munisípiu.

Antes ne’e, Konsellu Kombatente Libertasaun Nasionál munisipál ema na’in rua-rua mai iha nasionál hodi simu orientasaun, nune’e iha fevereiru ne’e kedas sira aranka ba munisípiu hodi rejistu iha kada edifísiu CCLN munisipál inklui Rejiaun Administrativa Espesiál Oé-Cusse Ambeno (RAEOA).

“Atu kondus totál veteranu nia oan to’o agora hira mak rejistadu ona ne’e Ministériu Asuntu Kombatente Libertasaun Nasionál (MAKLN) mak hatene. Prosesu sei la’o hela, depois loron 22 marsu termina mak depois ministériu relevante sei fó sai ba ita,” nia hateten.

Konsellu Ministru aprova dekretu-lei numeru 8/2009, loron 15 janeiru, kona-ba Rejime Atribuisaun Bolsa Estudu ba martires no kombatente Libertasaun Nasionál nia oan sira-de’it.

Dekretu-Lei ida-ne’e atu garante igualidade ba asesu bolsa estudu ba Konsellu Kombatente Libertasaun Nasionál sira. Proposta Dekretu-Lei ne’e aprezenta direta hosi Ministru ba Asuntu kombatente Libertasaun Nasionál em ezersísiu Gil da Costa Monteiro “Oan Soru” iha Konsellu Ministru.

Entretantu, Oan Soru esplika dekretu-lei ne’e atu fó dalan ba martires sira-nia oan hotu hodi asesu bolsa estudu iha rai-laran sein iha diskriminasaun no Dekretu-Lei ne’e sei la fó dalan ba veteranu ne’ebe sei moris nia oan sira atu hetan bolsa estudu.

Nível estudu ba kandidatu bolsa estudu mak hanesan hosi primeiru siklu ensinu báziku, segundu no terseiru siklu ensinu báziku, ensinu sekundáriu no ensinu superiór iha Timor-Leste.

Dokumentu ne’ebé kandidatu sira tenke prenxe mak formuláriu rekerimentu bolsa estudu, kartaun eleitorál hosi kandidatu, billete identidade, sertidaun baptizmu ka RDTL hosi kandidatu orijinál.

Dokumentu ne’ebé komprova kandidatu matríkula eskolár no dokumentu ne’ebé komprova aproveitamentu hosi kandidatu iha tinan letivu 2021 ho rezultadu eskolár ida-idak no mídia finál no konta bankária hosi kandidatu nian.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here