Logotipu La'o Hamutuk. Imajen/Espesiál

DILI, 09 marsu 2022 (TATOLI)—Organizasaun Naun Governamentál (ONG) La’o Hamutuk apresia deklarasaun hosi Misaun Permanente Timor-Leste iha Nasaun Unida, durante sesaun estraordináriu Asembleia Jerál Nasaun Unida ba dala-11.

“La’o Hamutuk apresia deklarasaun hosi Misaun Permanente Timor-Leste ni’an iha Nasaun Unida durante sesaun estraordináriu Asembleia Jerál Nasaun Unida ba dala-11. Deklarasaun ida-ne’ebé apela ba Nasaun hotu atu respeita lei internasionál, deklarasaun univers­ál direitu umanu no respeita ba integridade soberania kada Nasaun nian,” refere nota imprensa ne’ebé Agência Tatoli asesu, kuarta ne’e.

Tanba, iha mundu ne’e ema barak halo esforsu makaas atu atinje dame, Nasaun Unida investe rekursu oioin hodi esforsu atu atinje pás no seguransa iha mundu maibé iha fatin barak kontinua iha okupasaun no funu, militarizmu no ditadura hodi nega direitu no liberdade umanidade ni’an, hanesan iha Yemen, Sahara Osidentál, Palestina, Myanmar, Papua Osidentál no sira seluk, ema mate rihun ba rihun, diretu umanu barak ba hetan violasaun.

“Timor-Leste nu’udár nasaun ne’ebé hetan invazaun hosi viziñu boot ida, ami nia kanek sira seidauk fitar, violasaun kontra ami-nian diretu fundamentál sira seidauk lakon hosi ami-nia memória. Nune’e ami sujere atu Nasaun Unida no Nasaun boot sira atu ajuda povu iha Ukránia, no la aumenta intensidade funu ne’e ni’an. Ami ezije atu Rúsia tenke sai imediatamente hosi territóriu Ukránia atu hapara sofrimentu grave ba populasaun sivíl sala laek sira,” nota ne’e haktuir.

Nune’e, ezije ba NATO la ho podér osidentál hodi fó presaun ba Rúsia atu prevene funu ne’ebé sai boot liután no hamosu konsekuénsia sai boot liután kontra Umanidade no seguransa mundiá no husu atu Nasaun viziñu sira atu simu refujiadu hosi Ukránia, nune’e bele hamenus sira-nia sofrimentu ne’ebé hetan hosi violénsia armada ida-ne’e.

Tanba, funu entre Rúsia no Ukránia tama ona iha faze konkretu ema barak hanoin, konflitu ida-ne’e iha de’it tensaun abstratu, infelizmente semana hirak liubá Rúsia halo invazaun kontra Ukránia no hosi atake ida-ne’e rezulta ona ema barak mate, estraga infrastrutura barak iha territóriu Ukránia nia no ema liu tokon rua (2.000.000) mak sai ona hosi Ukránia.

“Ami preokupa tebes funu iha Ukránia, ema sivíl no inosente sira mak sei sofre konsekuénsia todan hosi aktu ilegál no violente ida-ne’e, ema barak sei lakon moris, lakon riku soin no diretu ba liberdade hotu. Dalan di’akliu mak konflitu sira bele hetan rezolusaun hosi komunikasaun pasífiku, respeita soberania kada territóriu nasaun ida ni’an,” nota ne’e hateten.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here