Ministru Koordenadór Asuntu Ekonómiku (MKAE), Joaquim Amaral. Imajen TATOLI/Antonio Dasiparu

DILI, 09 marsu 2022 (TATOLI)— Governu liuhosi Ministériu Koordenadór Asuntu Ekonómiku (MKAE) no Ministériu Negósiu Estranjeiru no Kooperasaun (MNEK), sei hala’o kooperasaun liuhosi akordu bilaterál hodi garante seguransa ba traballadór Timór-oan, hafoin bele aranka ba serbisu iha Qatar, Uni Emirat Árabé (UEA).

“Ita labele pisimista demais ba buat ne’ebé ita seidauk halo, maibé ita sei haree didi’ak kompaña sira ne’ebé atu ita nia traballadór sira ba servisu. Liuliu ita haree kondisaun serbisu no protesaun di’ak ba ita nia traballadór sira ka lae ida ne’e mak ita tenke haree halo didiak,” Ministru Koordenadór Asuntu Ekonómiku (MKAE), Joaquim Amarál, hateten iha Palasiu Governu-Dili kuarta ne’e.

Setór Privadu Cammer PC Incanto Group hala’o ona akordu ho Jobs Globál atu halo rekrutamentu ba traballadór timór-oan hamutuk 2.000 hodi ba serbisu iha Dubai no Qatar.  

“Preparasaun ne’ebé Agência sira komesa halo ka rekruta ona traballadór ne’e konkordánsia entre setór privadu Timor-Leste no setór privadu Qatar, agora Governu nian mak haree oinsa atu garante kondisaun no seguransa ba ita nia traballadór sira atubele haruka traballadór sira ba,” nia akresenta.

Nune’e, Governante ne’e dehan Governu prontu apoia nafatin setór privadu sira atu haruka traballadór sira, maibé tenke iha kondisaun di’ak no garante seguransa ba timór-oan.

Vise Ministru MNEK, Julião da Silva. Imajen Tatoli/Egas Cristovão

Iha biban hanesan, Vise Ministru Negosiu Estranjeiru no Kooperasaun (VMNEK), Julião da Silva, informa sei koordena ho Ministériu Koordenadór Asuntu Ekonómiku (MKAE) hodi asina akordu bilateral ida ho Governu Qatar, hafoin haruka traballadór timór-oan bá servisu.

“Atu haruka traballadór ita nian ba iha Qatar ne’e rezultadu Expo Dubai nian, maibé ami haruka karta ona ba MKAE atu bele haree didiak no halo akordu entre nasaun rua foin bele haruka ita nia ema ba servisu tanba tauk ita nia sidadaun sira ba mak hetan problema ruma,” nia akresenta.

Daudaun, Cammer PC Incanto Group komesa halo ona rejistu rekertutamentu faze dahuluk ba timór-oan 300 ne’ebé hakarak ba servisu iha Qatar ho osan rejistrasaun $20.

Traballadór Timór-oan hirak ne’e sei ba serbisu iha Aeroportu, otél no setór produtivu seluk iha Dubai no Qatar.

Kritériu rekrutamentu ba traballadór hirak ne’e hanesan hatene lian inglés, fíziku di’ak no iha abiliadade, tanba faze intervista sei liu hosi Plataforma Zoom, liuhosi ekipa intervistadór  hosi Qatar no Timor-Leste.

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here