Ministru Ensinu Superiór Siénsia no Kultura, Longuinhos dos Santos. Imajen TATOLI/Francisco Sony

DILI, 09 marsu 2022 (TATOLI)–Ministru Ensinu Superiór Siénsia no Kultura (MESSK), Longuinhos dos Santos, orienta ona ekipa tékniku sira atu hahú halo analiza ba proposta Dili Institute of Technology (DIT) ba planu atu estabelese programa doutoramentu.

“Ha’u simu ona proposta hosi DIT no agora ha’u hatún ona orientasaun ba ekipa tékniku sira atu halo analiza ba proposta sira ne’e,” Ministru Longuinhos informa ba Agência TATOLI, iha Palásiu Governu, kuarta ne’e.

Notísia relevante: DIT hahú ona inzensaun propina semetre par ba estudante 3.775

Normalmente atu loke kursu ka programa ruma iha Instituisaun Ensinu Superiór nia laran, kestaun dahuluk maka presiza hetan lisensiamentu hosi MESSK, hafoin tenke halo analiza ho sériu ba inisiativa ne’e rasik.

“Serbisu ekipa tékniku nian hahú ona ho analiza ba proposta refere atu haree vantajen no dezvantajen hosi programa ne’e rasik, ho nune’e bainhira Instituisaun Ensinu Superiór foti desizaun ruma ho justu tuir duni nesesidade ne’ebé iha,” nia akresenta.

Iha fatin ketak, Reitór DIT, Alvaro Menezes, hateten, parte institutu hein de’it rekezitu molok atu hakat ba oin.

“Bainhira proposta ne’e hetan ona aprovasaun hosi Ministru, tenke mai halo fali avaliasaun hodi haree fasilidade, dosente inklui fundu atu realiza programa ba doutoramentu ne’e, atu nune’e bele fó garantia ba instituisaun realiza ninia programa,” nia tenik.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here