Fakuldade Edukasaun Arte Umanidade, Departementu Lian Inglés hosi Universidade Nasional Timor-Lorosa’e. Imajen/UNTL

DILI, 08 marsu 2022 (TATOLI)–Universidade Nasionál Timor-Lorosa’e (UNTL) tinan ne’e sei realiza estájiu ba estudante na’in-79 iha Fakuldade Edukasaun Arte Umanidade (FEAH, sigla portugés), Departamentu Formasaun Profesór ba Edukasaun Pre-eskolár atu sai profesór.

Diretora Departamentu Formasaun Profesór ba Edukasaun Pre-eskolár UNTL, Madre Francisca Maria Soares dos Reis, hateten, kursu pre-eskolár iha universidade públiku ne’e hahú ona iha tinan 2019, ne’ebé daudaun tama ona iha 4o ano, ho totál estudante hamutuk 267.

“Totál estudante 267 ne’e kompostu hosi estudante 4o ano hamutuk na’in-79, 3o ano na’in-50, 2o ano na’in-48 no 1o ano na’in-90. Estudante sira ne’ebé tama iha FEAH tanba hetan rekomendasaun hosi Ministériu Edukasaun Juventude no Desportu (MEJD),” Madre Francisca informa ba jornalista sira, iha salaun Fundasaun Oriente, tersa ne’e.

Notísia relevante: Seidauk Akredita, FEAH-UNTL kontinua prepara kondisaun

Inisiativa ne’e atu hasa’e kapasidade no abilidade pesoál sai profesór ne’ebé kualidade, nune’e bele prepara fali labarik sira iha futuru.

“Estudante 4o ano iha na’in-79 maka prepara-an ona atu tun ba halo estájiu hodi hasa’e sira-nia koñesimentu, nune’e bele iha métodu di’ak hodi hanorin fali labarik sira,” nia akresenta.

Iha sorin seluk, Reitór UNTL, João Soares Martins, konsidera edukasaun Pre-eskolár importante tebes iha sosiedade hotu, maski Timór seidauk dezenvolve di’ak, tanba ninia rekursu umanu sei menus tebes, tanba ne’e parte universidade hahú ona kursu tanba halo parseria ho Universidade de Minho.

Aleinde ne’e, formasaun ne’e hetan mós apoiu hosi profesór Portugal sira inklui profesór hosi Timor-Leste rasik.

“Hosi formasaun ne’e rasik, tempu besik sei realiza graduasaun ba lisensiatura na’in-79 iha kursu Edukasaun Pre-eskolár ne’e,” nia tenik.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here