Ámbitu pose estrutura kooperativa multisetoriál Brilla Akadémika UNTL, iha Fundasaun Oriente, Imajen/Espesiál

DILI, 08 marsu 2022 (TATOLI)–Sekretáriu Estadu Kooperativa, Elizário Ferreira, tersa ne’e, fó pose ba estrutura kooperativa multisetoriál Brilla Akadémika hamutuk ema na’in-sia, ne’ebé hamahon-an iha Universidade Nasionál Timor-Lorosa’e (UNTL).

Iha biban ne’e, Sekretáriu Estadu enkoraja estrutura hodi serbisu maka’as tanba kooperativa sei sai ponténsia boot iha nível komunidade akadémika.

“Kooperativa iha universidade ita haree iha ponténsia boot tanba iha estudante rihun ba rihun mak eskola iha UNTL no tanba ema barak mak sai ona antigu alunu, inklui ha’u, entaun ne’e ponténsia di’ak ba ita hodi hahú ohin no ba futuru,” Governante ne’e hateten iha salaun Fundasaun Oriente.

Notísia relevante: SEKoop konsidera kréditu uniaun sai espíritu ba dezenvolvimentu kooperativa

Nune’e, Elizário husu ba estrutura hotu ne’ebé ohin simu pose, atu bandinas serbisu, nune’e kooperativa bele buras ba nafatin.

Iha fatin hanesan, Reitór UNTL, João Soares Martins, husu ba estrutura kooperativa atu nafatin iha espíritu badinas hodi kontinua dezenvolve kooperativa ne’e.

“Normalmente bainhira deskute de’it ne’e difisil atu realiza, maibé ohin to’o ona mai etapa ida ne’e hanesan susesu boot, espera katak espíritu ne’e kontinua nafatin, nune’e ita-nia kooperativa bele buras no bele hala’o funsaun hanesan ita hotu hakarak,” nia akresenta.

Aleinde ne’e, Reitór konsidera kooperativa sai fatin formasaun no espera ba oin SEKoop sei apoiu nafatin UNTL, liuliu fakuldade ekonomia hodi hatene orsamentu sira relasiona ho kooperativa.

Iha fatin hanesan, Prezidente kooperativa multisetoriál Brilla Akadémika, Clarina David Lopes, hateten, kooperativa ne’e harii ho objetivu ajuda fó krédiku ba ema kbiit laek no estudante iha UNTL ne’ebé mak presiza atu fasilita iha área negósiu.

“La signifika katak ema riku de’it mak bele harii kooperativa, maibé ami-nia haree, ema kbiit laek sira mós bele halo negósiu liuhosi kooperativa,” nia enkoraja.

Nia husu ba estrutura UNTL atu oferese fatin ida ba kooperativa Brilla Akadémika atu hala’o serbisu.

“Dezafiu ne’ebé ita hasoru mak seidauk iha edifísiu hodi halo atividade ne’ebé mak planeia ona, nune’e ami mós husi ba parte universidade atu apoiu fatin ida atu ami bele hala’o atividade sira,” Clarina David tenik.

La haluha nia husu ba SEKoop atu kontinua fó apoiu halo formasaun kona-ba akontabilidade hodi kapasita membru iha área kooperativa.

“Matéria akuntabilidade ne’ebé mak Kooperativa uza iha Timor-Leste ne’e nível internasionál, ne’ebé bele fasilita tebes iha área kréditu,” nia dehan.

Kooperativa multisetoriál Brilla Akadémika hahú ho membru hamutuk 35, ne’ebé mai hosi UNTL iha nível Pro-Reitora Asuntu Estudantíl, hosi fakuldade iha área edukasaun, agrikultura no ekonomia iha UNTL.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here