Cidália Colo. Imajen Tatoli/Nelson de Sousa.

OÉ-CUSSE, 08 marsu 2022 (TATOLI)—Timor-Leste komemora loron mundiál feto ho tema “Igualdade Jéneru no Mudansa Klimátika”, inan-feton ida iha rai enklave Oé-Cusse hisik kosar buka osan sustenta ninia oan sira ba eskola.

Iha mundu tomak selebra loron mundiál feto ho tema “Igualdade Jéneru Ohin-Loron ba Futuru Ne’ebé Sustentável”, inan ida kesi kabun tuur iha Merkadu Maumate, suku Naimeko, sub rejiaun Pante Macassar, faan sasán hodi bele atende lia-mate ka lia-moris hodi la dependente de’it ba mane sira.

Inan-feton ne’e, dadeer to’o lorokraik, loron no kalan, hanoin ba ninia família nia moris ne’ebé sustentavel hodi halo negósiu lahatene kolen no fila-liman be nakonu ho domin no hala’o ho responsabilidade.  

“Iha ne’e ha’u faan produdu hanesan koto, foremungu, liis-mean no mutin, tomate, fehuk europa no seiñora ne’e, nia rendimentu mak faan iha loron baibain bele hetan $15 to’o $20 no tempu bazár bele hetan $30 ka $100,” Negosiante Blandina Tunis hateten ba Agência Tatoli iha merkadu Maumate, iha ámbitu komemorasaun loron mundiál feto, tersa ne’e.

Produtu sira-ne’e, nia haktuir, balun nia sosa iha Dili no balun fali sosa hosi agrikultór sira iha Oé-Cusse rasik hafoin nia ba faan fali iha merkadu.

Agaradese mba Maromak! Nia bele hala’o atividade negósiu ne’e tanba durante ne’e hetan asesu osan empréstimu hosi uniaun kooperativa iha Oé-Cusse ho fundu uitoan hodi bele hala’o nia atividade negósiu, nune’e nia bele kumpre selu fali osan ne’e kada fulan.

“Normalmente ha’u foti $500 funan $10, entaun kada fulan ha’u tenke fó filaosan $50 ba uniaun kooperativa. Durante ne’e, ha’u kumpre ho di’ak,” nia hateten.

Blandina Tunis, idade 32, hosi suku Usitasae, sub-rejiaun Oesilu, daudaun ne’e hela iha Oé-Cusse Vila nia kaben hanesan mós ema Oé-Cusse no daudaun iha oan na’in-ida (1) ne’ebé frekuenta eskola iha pre-primária.

Blandina hala’o estudu to’o de’it iha nivél ensinu sekundáriu no seida’uk ramata tanba iha tinan 2004 nia deside la kontinua nia estudu tanba hola mane sedu ka forma sedu uma-kain.

Daudaun ne’e, nia sempre iha vontade nu’udar negosiante hodi apoia nia kaben hanesan agrikultór bele buka osan hamutuk atende nesesidade família uma laran loro-loron nian.

Iha ambitu komemorasaun loron mundiál feto ne’e, nia hato’o mensajen ba feto maluk sira seluk atu hala’o atividade saida de’it importante mak presiza ho domin, hodi bele atinje objetivu ne’ebé iha liu-liu hanesan servi família la’ós buat ida fasil.

Nia husu Governu liu-liu autoridade Rejiaun Administrativu Espesiál Oé-Cusse Ambeno (RAEOA) atu kria kondisaun infraestrutura ba merkadu Maumate ho dignu, tanba daudaun ne’e negosiante sira balun faan de’it iha baraka bainhira tempu udan ne’e sira la seguru.

Nesesidade obriga, Cidália faan bua-malus

Nune’e mós, tanba de’it nesesidade obriga no iha domin hakarak tulun inan-aman, labarik feto Cidália Colo (12) hanesan estudante kuarta klase iha Eskola Bázika Filiál Meco Sika Loti, Oé-Cusse tenke faan bua no malus-fuan iha merkadu Merkadu Maumate, suku Naimeko, sub rejiaun Pante Macassar, Oé-Cusse.

“Faan bua no malus hahú hosi 2008 to’o agora ne’e, tanba nesesidade hodi bele sosa kadernu, lapizeira no farda ba an rasik,” nia dehan.

Nia faan bua no malus, imi keta hanoin sala, maibé nia aproveita tempu hodi faan produtu sira ne’e bainhira nia sai hosi eskola iha tuku 12h00.

Mezmu feto haree ba idade sei kiik no obstákulu oioin maibé la hamate ninia vontade no sempre  jere tempu hodi aproveita mós estuda iha tempu kalan.

“Daudaun ne’e ha’u hela iha Oé-Cusse Vila ho família. Ha’u-nia hanesan agrikultór hela iha foho,” nia dehan ho onestu.

Cidália iha maun no alin hamutuk na’in lima no nia hanesan oan datolu. Durante ne’e, nia sosa bua kada saku tamak ida hamutuk $20 no bainhira nia faan tutan fali bele manan funan $40.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here