Kandidatu Prezidente Repúblika períodu 2022-2027 ho númeru sorteiu 15, Felisberto Araújo Duarte, realiza kampaña loron daruak ho tipu fahe pamfletu iha suku Kuluhun. Imajen Tatoli/Nelson de Sousa.

OÉ-CUSSE, 08 marsu 2022 (TATOLI)—Kandidatu indepedente Prezidente Repúblika periódu 2022-2027 ho númeru sorteiu 15, Felisberto Araújo Duarte, tersa ne’e kansela atividade kampaña iha Rejiaun Administrativu Espesiál Oé-Cusse Ambeno (RAEOA).

“Ohin ami atu ba maibé dook, nune’e deside la ba tanba ita hanesan kandidatu indepedente sukat rekursu ne’ebé iha. Maibé atu kobre atividade efikás liu mak ekipa ida iha Oé-Cusse rasik antes ne’e fahe ona pamfletu no ami atu dezloka ba mós fahe pamfleitu, ne’ebé hanesan de’it,” Felisberto Araújo Duarte hateten ba Agéncia Tatoli, liuhosi telefónika.

Maibé, nia dehan, nia parte sei hala’o de’it konferénsia imprensa iha Dili ba mídia sira hodi informa kona-ba kansela atividade kampaña eleitorál ne’e ba Komisaun Nasionál Eleisaun (CNE, silgá portugés).

Tuir oráriu, kandidatu Prezidente Repúblika Felisberto Araújo ho lema “Timor-Leste Prósperu ho Esforsu Jerasaun Foun” sei hala’o kampaña iha tersa (08/03) iha Oé-Cusse Vila, postu administrativu Pante Macassar, ho tipu kampaña fahe pamfletu.

Tuir kalendáriu hosi Sekretáriadu Tékniku Administrasaun Eleitorál (STAE), kampaña eleitorál ba kandidatu Prezidente Repúblika na’in-16 ne’e hahú iha loron 02 marsu 2022 no sei ramata iha 16 marsu, no eleisaun prezidensiál ne’e sei realiza iha 19 marsu 2022.

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here