Bee Manas Marobo. Imajen Tatoli/António Gonçalves

BOBONARO, 08 marsu 2022 (TATOLI)– Xefe Suku Ilat-Laun, Postu Adminstrativu Bobonaro, Munisípiu Bobonaro, Juvinal Pires Amaral, fó-sai katak infraestrutura bázika iha sítiu Bee-Manas Marobo la funsiona.     

Daudaun ne’e infraestrutura bázika hanesan sintina intupidu, tanki bee-moos la funsiona, ai-kabelak hirak-ne’ebé tau iha uma laran hahú dodok ona, uma kakuluk anin sobu hotu lakon ona, lampu, besi no fiu mós ferujen hotu ona tanba la tahan bee nia manas.

“Ha’u husu Ministériu Turizmu presiza halo reablitasaun ba infraestrutura bázika hirak-ne’e, tanba sasán barak mak kondisaun la funsiona ona no aat hotu kedas, ne’ebé presiza dezenvolve nune’e fó retornu ba nasaun nomoos komunidade, tanba fatin ne’e ema barak mak hakarak vizita,” nia informa ba Agência TATOLI, iha Maliana tersa ne’e.

Nia haktuir, problema ne’e akontese kleur ona até Sekretaria Estadu Formasaun Profisional no Empregu (SEFOPE) rasik mós haree direitamente ona ho matan, maibé to’o agora seidauk iha planu atu halo reablitasaun ba fasilidade hirak-ne’e.

Nia fó hanoin ba Governu katak, bainhira iha ona planu atu reabilita presiza halo uluk estudu viablidade nune’e implementasaun hosi projetu ne’e bele garante ninia kualidade no durasaun tempu naruk.

“Fatin ne’e ninia temperatura manas maka’as, agora daudaun ne’e fatin hirak-ne’e loloos ita labele uza besi no kalen, aban bainrua mak ita uza nafatin materiál hanesan ne’e, hakarak lakohi tenke aat nafatin,” nia tenik.

Iha tinan 2017 autoridade suku tolu ne’ebé perténsia ba Marobo estabelese ona Komisaun Jestaun Turizmu Bee-Manas Marobo, foti desizaun hodi halo regulamentu operasionál ida halo kobreansa ba vizitante doméstika kada ema sentavu $50 no ema estranjeira $1.00.

Nune’e mós halo kobransa vizitante uza motorizada selu $1.00 no karreta $5.00 maibé atividade ne’e konsege paradu tiha dezde tinan 2017 tanba laiha baze legál hosi Governu no autoridade munisípiu entaun vizitante barak mak kestiona hodi lakohi koopera.

Xefe suku ne’e fó-sai katak, governu no autoridade munisípiu Bobonaro mós presiza estabelese uluk baze legál atubele iha lejitimidade ba komisaun refere nune’e bele halo konbransa ba vizitante sira.

Enkuantu Bee-Manas Marobo ne’ebé lokaliza iha foho Ilat Laun nia hún, iha munisípiu Bobonaro hori uluk kedas rekoñese nu’udar fatin destinasaun turístiku ho nune’e Sekretaria Estadu Polítika Formasaun Profisionál no Empregu (SEFOPE) liuhosi projetu Turizmu Komunitária reabilita no moderniza ona infrastrutura bázika hosi ninia orijinalidade.

Bee-Manas Marobo reaiblita hosi Sekretáriu Estadu Formasaun, Profesionál no Empregu (SEFOPE), Ilídio da Costa Ximenes  iha 2015 ho totál kustu $498,860 no inagura iha loron 08 dezembru 2016 hosi Ministru Planeamentu no Investimentu Estratéjiku, Kay Rala Xanana Gusmão.

Notísia relevante: SEFOPE sei koordena MTKI reabilita infraestutura bee-manas Marobo

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here