Sekretáriu Jerál g7+, Hélder da Costa. Foto António Goncalves

DILI, 07 marsu 2022 (TATOLI)— g7+ ho Universidade da Paz (UNPAZ), tersa ne’e, asina akordu kooperasaun hodi fó espasu ba estudante sira hala’o estájiu, peskiza no realizasaun semináriu ba estudante sira hodi hasa’e konesimentu iha nivél akadémiku-nia.

“Ohin, ita selebrasaun asinatura akordu kooperasaun iha área tolu ho Universidade da Paz (UNPAZ) ida maka atu espasu ba estudante UNPAZ, bele halo estájiu mai iha g7+ atu haklean estudante sira nia konesimentu kona-bá saida mak nasaun 20 hosi membru g7+ enfreta,” Sekretáriu Jerál g7+, Helder da Costa, hateten ba Agência TATOLI hafoin ramata asina MoU iha edifisiu g7+, Pálasiu Governu-Dili.

g7+ mós fó oportunidade ba estudante UNPAZ sira halo peskiza hodi bele hatene situsaun nasaun post konflitu hanesan Timor-Leste no nasaun frájil sira ne’ebé sai membru liuliu iha aspeitu dezenvolvimentu.

Alende ne’e, g7+ no UNPAZ mós formaliza realizasaun semináriu iha nivél univeridade nian hodi partilla esperénsia balun kona-ba organizasaun g7+ ba estudante sira hodi hasa’e  abilidade nuudar estudante iha nivél akadémiku.

“Kooperasaun ida ne’e ami sei kontinua hodi fó espasu ba Universidade sira, hanesan Universidade Nasionál Timor Lorosa’e (UNTL), Universidade Dili (UNDIL) no seluk tan atu hasae estudante sira nia konesimentu liuhosi iha área peskiza sira,” Helder da Costa kompromete.

Iha biban hanesan, Reitór UNPAZ, Adolmano Amaral, hateten g7+ no UNPAZ formaliza kooperasaun iha área tolu hodi  haruka estudante sira  mai halo estájiu peskiza iha g7+ no halo semináriu iha nivél universidade.

“Ami ho g7+ hala’o kleur ona, tanba antes ne’e g7+ hamutuk ho UNPAZ realiza ona semináriu kona-bá aspetu iha g7+ nian. Ohin,  ita mai formaliza hodi hametin liután kooperasaun ne’e ba oin ita bele husu  dirijente  g7+ atu hatama g7+ ba  iha materia ensinu aprendijazen hodi bele hanorin ba estudante sira iha UNPAZ,” nia akresenta.

Nune’e, Reitór UNPAZ ne’e hato’o agradesementu ba g7+ tanba ho vontade tomak hakarak koopera hodi hasa’e abilidade estudante sira.

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here