Mapa munisípiu Viqueque. Imajen/Espesiál

VIQUEQUE, 08 marsu 2022 (TATOLI)–Xefe aldeia Mane-haat, aldeia Mane-haat, suku Caraubalo, postu administrativu Viqueque villa, munisípiu Viqueque, José Leão, konsidera presiza loke Eskola Pre-eskolár iha nível aldeia, nune’e labarik sira bele asesu.

“Iha ha’u-nia aldeia ne’e labarik idade kiik barak no sira hakarak asesu ba Eskola Pre-eskolár maka kontinua ba Eskola Primária, maibé iha ne’e laiha. Iha Viqueque villa, Pre-eskolár iha fatin rua, maibé dook hosi labarik sira. Tanba ne’e, ami hakarak husu parte relevante sira loke netik Eskola Pre-eskolár hodi labarik sira bele asesu de’it iha aldeia laran,” Autoridade lokál hateten ba Agência TATOLI, hafoin partisipa iha diálogu populár hosi Kandidatu Prezidente Repúblika (PR) independente ho númeru sorteiu 10, Antero Bendito da Silva Barros, iha aldeia Mane-haat, tersa ne’e.

Notísia relevante: Kampaña iha Viqueque, Kandidatu PR Antero tau prioridade ba estrada

Tuir Xefe aldeia ne’e, liuhosi Eskola Pre-eskolár bele kapasita di’ak liután molok labarik sira kontinua estudu tuir mai.

Iha fatin hanesan, Kandidatu PR Antero Bendito da Silva Barros, hateten, Eskola Pre-eskolár importante.

“Iha territóriu laran, Eskola Pre-eskolár 20% de’it tanba investimentu Estadu la tau perioridade ba ida-ne’e. Bainhira ita loke Eskola Pre-eskolár, la’ós ita fó benefísiu ba aldeia Mane-haat de’it, maibé ba mós komunidade hosi aldeia seluk. Ha’u hanoin preokupasaun Eskola Pre-eskolár ne’e maka sai prioridade iha aldeia ne’e,” nia reforsa.

Entretantu, aldeia Mane-haat iha totál populasaun hamutuk 1.000-resin.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here