Diretór STAE Munisípiu Bobonaro, Mariano Viegas Amaral. Imajen Tatoli/Sérgio da Cruz.

BOBONARO, 07 marsu 2022 (TATOLI) – Diretór Sekretariadu Tékniku Administrasaun Eleitorál (STAE) Munisípiu Bobonaro, Mariano Viegas Amaral, husu Institutu Jestaun Ekipamentu, Institutu Públiku (IGE, I.P sigla portugés) atu aselera pedidu normalizasaun estrada ba sentru votasaun no estasaun votu iha munisípiu ne’e.

Baize ba dadus ne’ebé rekola iha terrenu identifika kondisaun estrada hamutuk 43 mak difisil asesu ba estrada hodi transporta materiál eleisaun, tanba kondisaun estrada liga ba sentru votasaun ne’e rai-monu, dalan no ponte kotu.

“Ami-nia pedidu ne’e submete ona ba Prezidente Autoridade munisípiu antes ona, husu atu enkamiña ba Obra Públika, IGE atu halo normalizasaun ba sentru votasaun sira-ne’ebé la asesu estrada, liuliu iha Cailaco no postu administrativu Bobonaro, ne’e duni ami presiza aselera antes loron eleisaun,” nia ko’alia iha Jináziu Maliana, segunda ne’e.

Bainhira IGE, I.P la konsege responde pedidu normalizasaun estrada identifikadu hirak-ne’e mak STAE  prevee ona orsamentu hanesan planu rezerva atubele aluga kuda no selu komunidade sira atu ajuda lori materiál sensitivu no la’ós-sensitivu ba iha sentru votasaun no estasaun votu.

“Meiu ida-ne’e ita halo atubele asegura de’it materiál sira to’o duni ba iha sentru votasaun no estasasun votu sira-ne’ebé dook nune’e ita-nia eleitór sira bele ezerse sira-nia direitu ba kandidatu Prezidente Repúblika,” nia katak.

Munisípiu Bobonaro iha sentru votasaun 130 no estasaun votu 150. Númeru ne’e kompostu hosi postu administrativu Atabae iha sentru votasaaun 13 no estasaun votu 15, Balibo iha sentru votasaun 20 no estasaun votu 24.

Iha postu administrativu Bobonaro iha sentru votasaun 40 ho estasaun votu 44, Cailaco sentru votasaun 15 no estasaun votu 16.

Iha parte postu administrativu Lolotoe iha sentru votasaun 15 no estasaun votu 15 no iha postu administrativu Maliana iha sentru votasaun 28 no estasaun votu 36.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here