Komandante PNTL Viqueque, Superentendente Polísia Sebestião Alves Quintão. Imajen TATOLI/Vitorino Lopes da Costa

VIQUEQUE, 07 marsu 2022 (TATOLI)—Durante Polísia Nasionál Timor Leste (PNTL) munisípiu Viqueque akompaña kampaña prezidensiál durante semana ida, nota katak mosu perturbasaun ordén públiku, nune’e aprezenta ona kazu rua ba Ministériu Públiku (MP).

“Kampaña prezidensiál ne’ebé mosu perturbasaun públiku ami konsidera krime, ami kaptura ona suspeitu no ohin ami  aprezenta ona  ba Ministériu Públiku (MP) ne’ebé iha kompeténsia atu hasa’e ba Tribunál, nune’e ita rona de’it desizaun,” Komandante PNTL Viqueque, Superentendente Polísia Sebestião Alves Quintão, hateten ba Agência TATOLI, iha salaun administrasaun, segunda ne’e.

Notisia relevante: PNTL kaptura joven na’in-tolu iha Uatulari

Nia dehan, kazu rua ne’e akontese iha suku Makadique, postu Uatulari, ne’ebé joven sira ho kondiasaun lanu mak halo pertubasaun no tempu ne’ebá kedan parte seguransa halo detensaun ba joven na’in-tolu.

“Hosi kazu konfrontasaun iha suku Macadique, rezulta joven tolu kanek, konfrontasaun dahuluk maizumenus tuku 16:45, joven rua hetan tuda iha parte ain no konfrontasaun daruak iha maizumenus tuku 19:35, rezulta joven ida hetan tuda iha pare tilun,” nia akresenta.

Hafoin akontese tan kazu ida tuda simpatizante sira ne’ebé ba partisipa kampaña iha Viqueque villa no fila hetan tuda tuku iha tuku 19:35 kalan.

“Antes ne’e PNTL la konsege kaputura, maibé hafoin ami halo identifikasaun konsege kaptura suspeitu ho inisiál AP iha sábadu (05/03) ne’e,” nia haktuir.

Hosi kazu rua ne’e, PNTL aprezenta suspeitu haat ba MP hodi prosesa tuir lei ne’ebé vigór.

“Festa demokrasia kada tinan-lima dala-ida, nune’e ita hakarak fó garante ba ema hotu ninia diretu liberdade atu halo movimentu no tuir kampaña ho livre, maibé falta konsiénsia hosi joven sira, to’o ikus mai mosu konfrotasaun, tanba ne’e PNTL nafatin  atua  ho sériu,” Superentendente Polísia Sebestião Alves Quintão akresenta.

Jornalista : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here