DILI, 07 marsu 2022 (TATOLI)— Xefe Departementu Relasaun Públiku Komandu Jerál Polisia Nasionál Timor-Leste (PNTL), Superintendente Xefe, Armando Monteiro, informa PNTL seidauk bele detein suspeitu prinsipál ba kazu sona membru FALITIL-Forsa Defeza Timor-Leste (F-FDTL) ho inisial ETF, idade (36) iha Kuluhun Baixo, sábadu (4/3/) ne’e.
“Akontesimentu kazu Kuluhun Baixo ne’ebé sona membru FALITIL-Forsa Defeza Timor-Leste (F-FDTL) inisial ETF idade (36), ne’e Polisia Nasionál Servisu Investigasaun Kriminal (PNSIK), halo ona identifikasaun ba suspeitu nain lima, ne’ebé maka deskonfia envolve iha ofensa integridade fízika ida ne’e, hosi sira na’in- lima ne’e ita hasai ema ida nian estatutu atu sai autór prinsipál maibé seidauk halo detensaun tanba presiza tan evidesia balun,” Superintendente Xefe Armando Monteiro hateten ba jornalista liuhosi konferénsia imprensa ne’ebé halo iha Kuartél Jerál PNTL-Caicoli, segunda ne’e.
Daudaun ne’e, PNSIK kontinua halo investigasaun ba kazu sona membru F-FDTL foun ne’e hodi deteta suspeitu prinsipál ba kazu ne’e hodi detein no prosesa tuir dalaa legal.
“Kazu ne’e agora iha hela prosesu investigasaun nia laran no suspeitu seidauk detein tanba sei dezenvolve no koleta informasaun balun liután tanba keta iha suspeitu sira seluk,”nia akresenta.
Motivu hosi kazu ne’e ne’e, tanba vítima ho nia kolega sira hemu tua hamutuk iha sira nian fatin Kuluhun Baixo no haksesuk kona-ba ida-idak nia talent.
“Ikus mai mosu baku malu no to’o sona malu iha fatin akontesimentu entre sira ho sira laiha ema seluk ne’ebé mak envolve. Daudaun vítima hetan ona atendimentu intesivu iha Hospitál Nasionál Guidu Valadares (HNGV),” nia esplika.
Notísia relevante: Kazu sona membru F-FDTL foun iha Kuluhun, PNSIK identifika ona suspeitu ida
Jornalista: Natalino Costa
Editór : Florencio Miranda Ximenes