Kandidatura Prezidente Repúblika periudu 2022-2027, Tito da Costa Cristovão "Lere Anan Timur", realiza kampaña ho tipu komisiu, Iha Kampu Eis Merkadu Munisipiu Manatuto, kuarta (02/03). Imajen Tatoli/Francisco Sony.

DILI, 07 marsu 2022 (TATOLI)—Plan Interansionál Timor-Leste (PITL) ho Polísia Nasionál Timor-Leste (PNTL) apela ba sosiedade Timor-Leste evita konflitu durante períodu kampaña eleitorál iha eleisaun prezidensiál 2022.

Jestora Programa Prevensaun Konflitu PITL, Laura Pina, hateten PITL parséria ho Ministériu Interiór ho Sekretáriu Estadu Protesaun Sívil (SEPS) liuhosi Departamentu Nasionál Prevensaun Konflitu Komunitáriu atu fornese mensajen importante kona-ba oinsá kontribui ba pas no estabilidade iha país ne’e.

“Ida-ne’e nesessáriu tebes atu garante ba sosiedade hotu atu evita konflitu no mós ajuda atu oinsá respeita ema hotu-hotu atu proteje labarik no garante joven feto no mane hotu ne’ebé mak eskola no halo atividade loro-loron nian no seguransa,” Laura Pina hateten iha salaun reuniaun Ministériu Interiór, Caicoli, segunda ne’e.

Diretór Prevensaun Konflitu Naisonál iha Departamentu Prevensaun, Superintendente Ismael Babo, hateten SEPS foka liu ba mitigasaun ba prevensaun konflitu iha nível komunitáriu.

“Ami espalla mensajen ba komunidade hotu-hotu atu garante no oinsá evita konflitu durante períodu kampaña eleitorál.  Tanba ema hotu iha direitu atu vota ba ninia prezidente foun,” Babo haktuir.

Vise komandante PNTL, João Sancho Pires, hateten durante loron tolu (3) atu divulga mensajen importante ba komunidade hotu iha Dili liga ho prevensaun konflitu sira iha aldeia no suku kapitál Dili nian.

“Ami alerta ba komunidade hotu-hotu atu labele kontribui ba kualker konflitu ho tipu violénsia kontra ema-nia direitu. PNTL prontu iha oras 24 nia-laran hodi garante ema hotu sei moris iha situasaun seguransa ne’ebé mak seguru no PNTL la permite kualker ema halo krime,” nia dehan.

Programa PITL ne’e ninia atividade sei alarga to’o iha Munisípiu Aileu no Ainaro, no programa ne’e realiza durante tinan tolu (3) ne’ebé finansia hosi PITL ho nia valór osan hamutuk $10.000.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here