Atividade traballadór iha projetu estrada Manduki, Atabae. Imajen TATOLI/António Gonçalves

DILI, 07 marsu 2022 (TATOLI)—Ministériu Obra Públika (MOP) liuhosi Diresaun Nasionál Aprovizionamentu (DNA) kontinua sensibiliza dekretu-lei númeru 17/2021 ne’ebé ko’alia kona-ba sertifikasaun no inskrisaun ba empreza lokál konstrusaun sivíl no empreza konsultáriu tékniku sivíl iha munisípiu hotu.

Diretór Nasionál Aprovizionamentu, Quitiliano Belo, hateten, Departamentu Rejistu Venda no Departamentu Jestaun Kontratu Servisu hamutuk ho Kámara Komérsiu Indústria Timor-Leste (CCI-TL, sigla portugés) hafoin asina akordu iha tinan kotuk, hetan tulun hosi CCI-TL nasionál no munisípiu hodi ekipa kontinua tun kedas ba munisípiu sira hodi halo diseminasaun dekretu-lei.

“Tuir loloos, prosesu rejistu hahú ona iha inísiu janeiru  liubá, maibé tanba de’it kestaun téknika no administrativa, kolega sira seidauk konsege halo rejistu, maski nune’e, kolega sira serbisu nafatin hodi halo diseminasaun lei no guai apoiu ba munisípiu sira hotu, molok hahú halo emisaun ba sertifikadu no hela de’it Rejiaun Administrativa Espesiál Oé-cusse Ambeno (RAEOA) mak seidauk, espera bele akontese fulan oin,”  Diretór Nasionál hateten liuhosi nota ne’ebé Agência TATOLI asesu, segunda ne’e.

Notísia relevante: MOP-CCI selebra akordu pra-kualifikasaun empreza konkorre konkursu públiku

Nia konsidera, sertifikasaun ne’e la’os buat foun tanba antes ne’e MOP konsege sertifika no valida empraza lubuk ida to’o iha tinan 2015, maibé tanba sistema (plataforma) experidu, entaun MOP para tiha no halo emprezáriu barak lakon sertifikasaun ne’e.

“Nune’e, bainhira ami simu orientasaun hosi Ministru Obra Públika, ami koko organiza-an hodi reativa fali sistema no kontinua halo aprosimasaun ho CCI-TL hodi akomoda mós hanoin balun hosi CCI-TL nian katak Emprezáriu timor-oan prontu ona atu ezekuta obra ho montanta millaun $1,5 to’o laiha limite, ikus mai lei alteradu,” nia akresenta.

Esforsu hirak ne’e nu’udar maneira ne’ebé Estadu liuhosi Governu halo hodi kapasita no kapitaliza emprezáriu no rekursu enjiñeiru empreza.

Governu ne’e to’o mai konkluzasaun katak tempu ona atu promove projeitu sira tuir lei no regra sira, katak kualker projetu hotu tenki liuhosi konkursu públiku, nune’e empreza ne’ebé manán ho responsablidade bele ezekuta obra ne’ebé mak nia manán (la fa’an tun sa’e) hodi garante kualidade ba tinan naruk.

“Ita hotu nia mehi hakarak hakbiit kontratór konstrusaun sivíl nian, liuliu munisípiu Dili no territóriu Timór laran tomak, sai parseiru forte hodi bele ajuda Governu kria kampu ba serbisu. Aleinde ne’e ita mós hakarak empreza konstrusaun sivil sira bele hetan grau ne’ebé merese duni, nune’e bele iha kbiit mós hanesan ho ema internasionál sira, maski la’ós fasil,”nia akresenta.

Maibe ho lei sertifikasaun ne’ebé iha ona, pelu menus bele ajuda ona setór privadu nasionál sira hetan rekoñesimentu no valór ne’ebé ekiparadu ho ema internasionál bainhira hetan atribuisaun sertifikadu A, B1 B2 no C.

“Tanba ne’e, MOP liuhosi Diresaun Nasionál Aprovizionamentu no Diresaun Jerál Administrasuan no Finansa konvida setór privadu nasionál, liuliu sira ne’ebé haknaar-an iha konstrusaun sivíl atu rejistu ita boot sira nia-an, nune’e bele hetan rekoñesimentu  tuir lei hateten katak grau A 1500 laiha limitasaun, grau B1 750-1500B2 250-750 no C 25-250,” nia subliña.

Nune’e, MOP liuhosi DNA nakloke nafatin ho sujestaun no rekomendasaun hosi setór privadu sira hodi mellora no hadi’a liután sistema sertifikasaun.

“Husu mós ba Presidente CCI-TL ho ekipa atu mantein halo asesoria no advokasia téknika ba ita-nia polítiku sira hodi hadi’a liután lei sertifikasaun no lei aprvizionamentu, nune’e labele iha diferénsia entre lei rua ne’e iha futuru oin mai,” nia dehan.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here