Xefe Departamentu Relasaun Públika Komandu Jerál Polisia Nasionál Timor-Leste, Superintendente Xefe Armando Monteiro, Imajen Tatoli/Natalino Costa

DILI, 07 marsu 2022 (TATOLI)— Xefe Departementu Relasaun Públiku Komandu Jerál Polisia Nasional Timor-Leste (PNTL), Superintendente Xefe, Armando Monteiro, informa oknum Unidade Polisia Maritima (UPM) nain-neen ne’ebé deskonfia envolve iha kazu baku mate Júlio Amarál iha suku Suai Loro, postu administrativu Suai-vila, munisípiu Covalima kumpre ona prizaun preventiva.  

“PNTL finaliza tiha tuir lei, hafoin akontesimentu ne’e detein sira durante 72 nia laran hodi no aprezenta ba Ministériu Públiku hodi tuir primeiru interogatóriu no daudaun sira iha ona prizaun preventiva. Ne’ebé ita hein tan faze julgamentu tuir mai mak ita foin hatene loloos,” Portavóz Komandu PNTL ne’e hateten liuhosi konferénsia imprensa iha Kuartél Jerál PNTL-Caicoli, segunda ne’e.

Notísia relevante: PNTL detein membru UPM na’in-neen deskonfia baku mate Júlio Amarál

Suspeitu na’in-neen ho inisiál MDD, LMA, GDN, MMF, JD no nia kolega ida, Tribunál Distritál Suai aplika medida koasaun prizaun preventiva, hafoin Ministériu Públiku akuza ho krime omisídiu agravadu ne’ebé mak previstu iha kódigu penal 139.  

Kazu ne’e akontese iha loron domingu (23/01), tuku 3:30, madrugada, suspeitu sira no matebian sira hotu lanu no sira haksesuk malu ho buat kiik-oan, ida, maibé dada to’o vítima Júlio Amaral lakon vida no nia-alin nain rua kanek todan.

Nia dehan, antes okum PNTL na’in-neen ne’e tuir julgamentu primeiru interogatóriu iha tribunál, ekipa hosi Departementu Justisa Komandu Jerál aplika ona sansaun disiplinar ba sira, nune’e bele separa sira hosi prosesu krime ne’ebe mak sira  hasoru.

“Sira nia estatutu agora hanesan arguido ne’ebé ita hein desizaun tribunál nia  tanba tuir lei kuandu fó pena ba sira tinan tolu ba leten hakarak ka lakohi institusaun tenke halo  medida liuhosi Reuniaun  Konsellu Superiór Seguransa atu deside  membru PNTL hosi UPM nain neen ne’e sera que sira sei servisu nafatin iha institusaun PNTL ka fila ba vida sívil,” nia afirma.

Notísia relevante:  Komisaun B husu Komandu Jerál investiga kazu baku mate Júlio Amaral

Jornalista: Natalino Costa

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here