Kandidata Prezidente Repúblika, Maria Elena Lopes de Jesus Pires. Imajen Tatoli/Celestina Teles.

COVALIMA, 07 marsu 2022 (TATOLI)—Kandidata Prezidente Repúblika Maria Elena Lopes de Jesus Pires, hateten bainhira povu fó fiar sai Xefe Estadu mak nia sei pronunsia ba Governu hodi fó prioridade ba setór saúde, edukasaun no kria kampu traballu ba joven sira.

“Ita ko’alia kona-ba saúde, edukasaun mós sai preokupasaun ba ita. Ita hatene ita-nia klinika no ita-nia ospitál laiha kondisaun, ne’ebé susar hetan tratamentu. Se ha’u eleita sai Prezidente Repúblika, ha’u sei propoin ba Governu hodi tau prioridade ba área saúde, edukasaun no kria kampu traballu ba joven sira,” Maria Eelena “Milena Pires” hato’o liuhosi kampaña ho tipu diálogu ne’ebé realiza iha suku Camanasa, postu administrative Suai Vila, segunda ne’e.

Ho difikuldade ne’ebé povu enfrenta iha área hirak ne’e mak kandidatura ho númeru sorteiu 7 ne’e hakarak ko’alia kona-ba polítika foun, nune’e joven sira bele hetan benefísiu ba dezenvolvimentu hodi bele ba eskola ho kualidade di’ak no hetan tratamentu saúde di’ak iha óspital.

Apoiante kandidata Prezidente Repúblika, Maria Elena “Milena Pires”, partisipa iha kampaña ho tipu diálogu ne’ebé realiza iha suku Camanasa, postu administrativu Suai Vila. Imajen Tatoli/Celestina Teles.

“Ita ko’alia kona-ba politika foun, ita nia dezenvolvimentu hetan benefísiu hanesan joven bele eskola ho kualidade, joven no inan-feton ba ospitál bele hetan tratamentu hodi bele kura moras ne’ebé iha. Ida-ne’e mak ita ko’alia kona-ba mudansa. Mudansa tenke akontese agora, labele hein tan tinan lima ne’ebé atu mai,” nia dehan.

Kandidata independente ne’e afirma, povu sira defisil atu trata dokumentu no joven sira-ne’ebé mak matenek defisil atu hetan servisu tanba sistema.

Nune’e, bainhira povu fó fiar ba nia sai Prezidente Repúblika mak ninia fatin la’ós iha Palásiu Prezidente Bairru Pite, maibé tenke hakbesik ba povu hodi haree komunidade iha área rurál sira-nia kondisaun moris loro-loron nian.

Maske iha setór edukasaun, saúde, agrikultura no kria kampu servisu la’ós Prezidente Repúblika nia kompeténsia, maibé nu’udar Xefe Estadu tenke relata ba Governu kona-ba povu nia halerik no preokupasaun sira kona-ba saúde, edukasaun, infraestrutura no seluk tan.

Aleinde haree povu nia moris iha rai-laran, Prezidente Repúblika nia knar iha internasionál ne’e Timor-Leste sei hasoru difikuldade, entaun PR presiza ativu hodi hatuur TL nia naran di’ak iha mundu.

“Ita presiza PR ativu mós iha internasionál hodi hatuur fali TL nia naran di’ak, atu bolu no fó fiar ba investidór estranjeiru sira mai investe iha TL iha área turizmu, agrikultura, loke fábrika hodi fó servisu ba joven sira no ita-nia inan sira,” nia hateten.

Kampaña ne’e superviziona hosi Komisaun Nasionál Eleisaun (CNE), Provedoria Direitu Umanu no Justisa (PDHJ) no observadór internasionál hodi haree prosesu hotu, inklui Lei Eleitorál nian hodi bele fó susesu ba iha kampaña tinan ida-ne’e, no hetan seguransa másimu hosi Polísia Nasionál Timor-Leste (PNTL).

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here