Porta Vóz ekipa susesu kandidatura Prezidente Repúblika 2022-2027, Francisco Guterres, Lú-Olo, Fernando Dias Gusmão. Imajen Tatoli/Francisco Sony.

DILI, 07 marsu 2022 (TATOLI)–Ekipa susesu Kandidatu Prezidente Repúblika (PR), Francisco Guterres ‘Lú Olo’, husu ba Polísia Nasionál Timor-Leste (PNTL) atu halo investigasaun ba konfrontu ne’ebé akontese domingu ne’e, iha munisípiu Baucau, ne’ebé envolve apoiante kandidatu ho númeru sorteiu 06 no númeru sorteiu 09.

“Ami haree iha mídia, joven sira ne’e uza kamizola FRETILIN, maibé atu konkretiza loloos nia militante partidu nian tenki liuhosi investigasaun, labele haree faru ne’ebé ema ida hatais, tanba ema ne’ebé la gosta ita hakarak bele sobu situasaun no nia mós bele hatais faru ne’e lori ba halo krime, tanba ne’e liuhosi investigasaun maka bele komprova katak nia ne’e militante duni ka lae,” Koordenadór ekipa susesu, Fernando Dias Gusmão, informa liuhosi konferénsia imprensa ne’ebé hala’o iha sede Kandidatu PR Lú Olo, Luz Clarita, Bairru Formosa, segunda ne’e.

Notísia relevante: Konfrontu iha Baura, Joven Nain Rua Mate, Tolu Kanek no Uma Neen Hetan Sunu

Tuir Fernando Gusmão, mekanizmu dahuluk rezolve konfrontu maka vítima sira ne’ebé kanek tenki hetan uluk tratamentu, enkuantu kona-ba aktu krime, nasaun iha lei tanba ne’e tenki implementa lei ho rigor.

“Bainhira A halo krime, A ne’e mak tenki ba hatán, tanba ida-ne’e la’ós orientasaun hosi kandidatu ka líder partidu, ne’e joven individuál ne’ebé dala ruma rame demais, entaun provoka malu hodi sai tiha situasaun ida-ne’e,” nia akresenta.

Nune’e, Portavóz ne’e apela ba militante, simpatizante no apoiante Kandidatu PR Lú Olo, atu hakmatek, promove páz no estabilidade.

“Kandidatu Lú Olo hakarak apela ba militante, apoiante, juventude no povu tomak atu kuidadu, tanba iha tentasaun hosi ema ne’ebé lakohi ita-nia nasaun moris iha estabilidade ne’ebé di’ak, entaun sira hakarak sobu situasaun ne’ebé la’o kapas tebes. Ida-ne’e maka tenki kuidadu no ita labele halo violénsia, husik ita-nia povu livre, akompaña kandidatu sira, hafoin hili kandidatu ne’ebé di’ak liu. Labele fó espasu ba tentasaun atu estraga Plataforma VIII Governu, tanba Governu atuál liu ona situasaun ida ne’ebé estável, Orsamentu Jerál Estadu tinan tolu tutuir malu pasa ho di’ak,” nia apela.

Aleinde ne’e, nia husu ba povu tomak atu hakmatek iha idaidak ninia fatin, nune’e kampaña bele la’o ho susesu, nune’e mós ba autoridade seguransa, husu atu kontrola situasaun kampaña ho di’ak no bainhira hetan ema ruma viola lei no orden públiku, presiza atua tuir lei ne’ebé vigora.

“Husu atu halo investigasaun loloos, tanba vídeo ne’ebé mak publika iha mídia sosiál parte rua hetan hotu agresaun, parte ida hosi partidu KHUNTO nian mós hetan no militante FRETILIN nian mós hetan, ne’ebé sira-rua ne’e hanesan de’it. Komunikasaun entre líder sira la’o nafatin no di’ak tebes. Tanba ne’e maka husu ba apoiante sira atu hakmatek tanba líder sira iha komunikasaun di’ak tanba ami iha aliadu ida de’it,” nia Koordenadór ekipa susesu.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here