Prezidente Komisaun Nasionál Eleisaun (CNE, sigla portugés), José Agostinho da Costa Belo. Imajen Tatoli/Osória Marques.

DILI, 07 marsu 2022 (TATOLI)–Prezidente Komisaun Nasionál Eleisaun (CNE, sigla portugés), José Agostinho da Costa Belo, husu kandidatu Prezidente Repúblika hotu-hotu atu respeita asinatura Paktu Eleisaun Pasífiku.

“Ita husu nafatin ba kandidatu Prezidente Repúblika hotu-hotu atu respeita asinatura Paktu Eleisaun Pasífiku ne’ebé mak asina ona iha loron 28 fevereiru liubá, labele insulta malu iha tempu kampaña,” José Belo hateten ba joranalista sira, iha salaun Media Center CNE, Colmera, segunda ne’e.

Tanba ne’e, nia dehan, atu di’ak liu evita insulta malu no kuidadu ho liaguajen ne’ebé mak hato’o ba povu iha kampaña eleitorál, tanba bele iha nia impaktu ladi’ak ne’ebé mosu bainhira prosesu kampaña la’o hela.

“Ne’ebé atu di’ak liu hato’o de’it ita-nia papel kandidatu nian no bainhira sai Prezidente Repúblika karik sá programa mak ita bele hato’o ba sidadaun sira, ho ida-ne’e mak ita bele hakmaan eleitór sira para oinsá ita mós bele konvense sira, nune’e fó sira-nia votu karik ho rasionál,” nia haktuir.

Hakark sai PR ne’e tenke nakonu ho responsabilidade no hakarak duni atu fó imi-nia kontribuisaun ba rai no povu ida-ne’e, entaun presiza hamosu linguajen ho kalma, di’ak no nakonu ho responsabilidade iha prosesu kampaña eleitorál.

Nia kontinua husu ba ekipa susesu kada kandidatu nian atu orienta ninia apoiante sira atu respeita malu entre kandidatu ida ho seluk bainhira halo kampaña, tanba halo foer de’it kandidatu PR nia imajen.

Husu kona-ba kandidatu balun ne’ebé kansela kampaña, nia hatán, pratikamente direitu sira-nian durate loron 15 maibé sira hakarak muda fali ba loron seluk ne’e depende importante mak tenke informa ba iha CNE, nune’e bele reajusta kalendáriu no seguransa sira mós bele halo seguransa.

Konfrontu akontese iha Baucau

Nia dehan, akontesementu konfrontu entre apoiante hosi kandidatu PR númeru sorteiu 6 no 9 iha Munisípiu Baucau ne’e, tanba kandidatu PR falta respieta ba kalendáriu kampaña nian.

“Ekipa kandidatu munisípiu sira tenke koordena ho ekipa nasionál, nune’e kalendáriu ne’ebé mak reajusta no koñesimentu hanesan nune’e kandidatu ida-idak bele halo kampaña no ida-ne’ebé mak loron kampaña tenke respeita labele provoka malu iha prosesu kampaña ne’e nia laran,” nia dehan.

Ho kestaun ne’e, CNE husu ba Polísia Naisonál Timor-Leste (PNTL) atu nafatin halo seguransa no kandidatu ida-ne’ebé mak la respeita tenke fó atensaun no sira-ne’ebé mak halo krime PNTL atua kedas, tanba ne’e hatudu imajen Timor nian ladi’ak ba mundu tomak.

Tuir loloos kandidatu númeru surteiu 9 mak halo kampaña iha Baucau maibé kandidatu seluk tama entaun mosu problema tanba parte PNTL ho CNE observa katak hotu-hotu iha reasaun no asaun mak mosu krime ne’e maibé parte seguransa atua ona.

“Ita seidauk hatene katak ida-ne’ebé mak suspeitu no vítima tanba sei iha investigasaun nia-laran,” nia hateten.

Notísia Relevante: PNTL kontinua buka-tuir autór ba konfrontu iha Baucau       

Jornalista : Osória Marques

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here