CNE no Koordenador ekipa susesu Prezidente Repúblika, PNTL no Konsellu Veteranu Baucau foto, hala’o reuniaun iha Vila Nova, Segunda (07/03). Imajen Tatoli/Natalino Belo.

BAUCAU, 07 marsu 2022 (TATOLI) – Komisaun Nasionál Eleisaun (CNE, sigla portugés) Munisípiu Baucau, segunda ne’e liuhosi enkontru halibur koordenadór ekipa susesu kandidatura Prezidente Repúblika hodi solusiona dezintendementu entre militante relasiona ho konfrontu iha Baucau.

Diretór CNE Baucau, Esmeraldo Damião Belo hateten, hanesan órgaun másimu ba prosesu eleisaun tomak, iha obrigasaun atu halibur koordenadór ekipa susesu kandidatura Prezidente Repúblika sira-ne’ebé eziste iha Baucau hodi rona no fó hanoin atu prevene konfrontu entre militante sira durante períodu kampaña eleitóral iha Baucau.

“Ha’u apelu atu koopera no serbisu hamutuk ba Baucau nia di’ak, simu no dame malu, labele hamosu violénsia iha rai Baucau,” Diretór CNE hateten iha Vila Nova, segunda ne’e.

Esmeraldo akresenta, bainhira mosu konfrontu sei hamosu instabilidade no munisípiu Baucau nia naran mak sei fo’er.

Komandante PNTL Munisípiu Baucau, Superintendente Xefe, António Maria de Sá, agradese ba kolaborasaun hosi koordenadór ekipa susesu sira-ne’ebé kolabora atu solusiona problema ne’ebé akontese iha loron domingu (06/03).

“Ita hirak-ne’e solusaun ba problema la’ós buka problema,” Superintendente Xefe António de Sá hateten.

António husu ba koodenadór sira atu mantein seguransa, komunika, koordena no kolabora ho parte seguransa nune’e bele prevene konfrontu durante kampaña iha Baucau.

Koordenadór Ekipa Susesu Kandidatura númeru sorteiu 9, Armanda Berta dos Santos, Angelo Angelito Freitas Correira, rekomenda ba entidade hotu atu respeita, fiar malu tuir paktu seguransa ne’ebé asina ona hosi koordenadór ekipa susesu sira iha PNTL Baucau.

Nia hatutan, importante labele hamosu provokasaun, insulta malu nune’e evita mosu konfrontu entre militante sira iha baze.

“Ami mai atu koopera ho autoridade seguransa, fó hanoin ba malu atu oinsá ba buat ne’ebé akontese tuir dalan legál no ba futuru hadi’a atu labele akontese tán,” Angelo hateten.

Reuniaun ne’e inisia hosi CNE Baucau partisipa hosi Komandante PNTL Baucau, Konsellu Munisípal Kombatente Libertasaun Nasionál (CMCLN, sigla Portugés) no koordenadór ekipa susesu sira iha Baucau.

Jornalista   : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here