AMD aloka osan sosa karreta. Imajen Tatoli/Nelia Fernandes.

DILI, 07 marsu 2022 (TATOLI)—Governu liuhosi Autoridade Munisípiu Dili (AMD) aloka orsamentu hamutuk $368,852.00 sosa kareta 10 hodi utiliza ba nesesidade servisu.

“Ita-nia kareta 10 ne’e kompostu hosi Pick Up, Ambulánsia Vulneravél rua no karreta Box ida,” Adjuntu Prezidente Autoridade Munisípiu Dili (AMD), António Moniz Clau, informa ba Agência Tatoli, iha nia knaar-fatin, Dili, segunda ne’e.

Karreta 10 ne’e, Autoridade Munisípiu Dili sei distribui balun ba Ministériu Edukasaun no Ministériu Saúde, ne’ebé daudaun ne’e sei prosesu hela tanba AMD sei koordena ho patrimóniu Estadu atu prepara didi’ak nia númeru no kode karreta nian, bainhira kompletu ona mak AMD sei integra.

“Hanesan karreta Pick Up, ita sei distribui ida ba Diretór Edukasaun Munisípiu Dili no karreta neen seluk AMD atu halo jestaun ba iha munisípiu rasik,” nia esplika.

Kareta Box ida-ne’e, AMD atu fó ba Ministériu Saúde atu asegura ai-moruk sira kuandu dezloka ba fatin-fatin ka ba postu saúde sira iha teritóriu nasionál.

“Enkuantu, ba ambulánsia vulneravél próvizoria ita seidauk bele integra tanba tuir planu munisípiu Dili nian, ita mak sei halo jestaun ba ida-ne’e. Maibé, ida-ne’e ita sei iha planu hela, seidauk serteza ba ida-ne’e. Ita haree hosi kompeténsia, ita iha kompeténsia, nune’e ita haree mós hosi difikuldade kondutór sira, tanba ne’e ita sei haree hela nia preparasaun maibé iha planu munisípiu Dili mak sei jere rasik,” nia dehan.

Karreta 10 ne’e, nia dehan, AMD uza orsamentu 2021 liuhosi kapitál menór ho montante hamutuk $368,852, mak sosa karreta 10 ne’e hodi utiliza ba nesesidade servisu.

Notísia Relevante: OJE 2022, Munisípiu Dili husu adisionál millaun $13,5

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here