Komandu Polísia Nasionál Timor-Leste (PNTL) Munisipiu Dili, sábadu (05.03) kalan ne’e halo apreensaun ba motorizada 55 ne’ebé dokumentu la kompletu. Imajen/Espesiál.

DILI, 06 marsu 2022 (TATOLI)—Polísia Nasionál Timor-Leste Komandu Munisípiu Dili hamutuk ho Dirasaun Nasionál Tranzitu no Seguransa Rodoviária, Forsa Rezerva ne’ebé hetan apoiu hosi Unidade Polísia Marítima no Unidade Patrollamentu Eskuadra Verra Cruz hala’o operasaun pasa revista ba sasán kro’at no motorizada iha tempu kalan.

Komandante Polísia Nasionál Timor-Leste (PNTL) Munisipiu Dili, Superintendente Xefe Polísia Henrique da Costa, informa iha operasaun pasa revista ne’ebé realiza iha sábadu (05.03) kalan ne’e PNTL konsege halo apreensaun ba motorizada 55 ne’ebé dokumentu la kompletu.

“Operasaun pasa revista ne’ebé mak ita horikalan hala’o hahú hosi 08h00-10h00 kalan, liu-liu ba sasán kro’at no motorizada sira-ne’ebé dokumentu la kompletu. Ba sasán kro’at ita la hetan maibé motorizada ne’e ita konsege prende motorizada 55,” Komandante PNTL Munisipiu Dili, Superintendente Xefe Polísia, Henrique da Costa, hateten ba Agência TATOLI, liuhosi WhtasApp, domingu ne’e.

Motorizada hirak ne’e, nia dehan, maiória laiha dokumentu komprovativu hanesan karta kondusaun no balun laiha espellu no xapa matrikula, nune’e Polísia Tranzitu Dili foti motorizada sira-ne’e no fó de’it billete ba infratór sira atu bele selu koima.

“Ami lori kedan motorizada sira-ne’e ba para iha Komandu PNTL Munisipiu Dili. Ita-nia infratór sira ba selu tiha koima iha banku mak bele foti fali sira-nia motor,” nia dehan.

Tuir planu, operasaun ba sasán kro’at ka arma branka no motorizada sira-ne’ebé laiha dokumentu komprovativu ne’e sei kontinua la’o nafatin.

Jornalista : Natalino Costa

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here