Prezidente Partidu Republikanu (PR), João Mariano Saldanha, deklara apoiu kandidatu PR Jos’e Ramos Horta. Imajen Tatoli/Natalino Costa.

DILI, 06 marsu 2022 (TATOLI)—Prezidente Partidu Republikanu (PR), João Mariano Saldanha, husu ba militante no simpatizante Partidu Republikanu sira atu fó sira-nia apoiu ba kandidatu Prezidente Repúblika ho númeru soreiu 14, José Ramos Horta.

“Militante no estrutura Partidu Republikanu tomak ne’ebé iha Timor laran, haree no fihir didi’ak hodi fó apoia ba kandidatu Prezidente Repúblika José Ramos Horta iha eleisaun prezidensiál 2022 ne’ebé sei realiza iha 19 marsu ne’e,” Prezidente Partidu Republikanu ne’e hateten liuhosi konferénsia imprensa ne’ebé hala’o iha eis Hotel, Lecidere, Dili, domingu ne’e.

Iha kandidatu Prezidente Repúblika períodu 2022-2027 hamutuk na’in-16 ne’e, kandidatu lubun ida mak iha kapasidade maibé kandidatu PR José Ramos Horta mak iha poténsia no kapasidade liu tanba iha ona esperiénsia kaer ukun hanesan Prezidente Repúblika.

“Ha’u husu ba joven, ferik ho katuas sira iha munisipiu 12 inklui RAEOA, ne’ebé tuir ha’u, rona ha’u-nia hanoin sira ne’e, atu ita hamutuk apiu kandidatu hosi CNRT ne’ebé lidera hosi Xanana Gusmao mak José Ramos Horta,” Fundadór João Saldanha University ne’e apela.

João Saldanha hateten, ninia apoiu ne’e la lori Partidu Repúblikanu nia naran maibé fó apoiu hanesan sidadaun no hanesan timor-oan ida ho ninia individu rasik.

“Kandidatu hotu-hotu iha kapasidade maibé kandidatu José Ramos Horta iha kapasidade atu lori nasaun Timor-Leste ba oin,” nia dehan.

Razaun fundamentu nia fó apoiu ba kandidatu José Ramos Horta tanba iha esperiéansia hatudu ona, iha nia mandatu dahuluk hanesan Prezidente Repúblika iha 2007-2012.

“Nia (Jose Ramos Horta) sei lidera hanesan Prezidente Repúblika mandatu 2007-2012, ha’u servisu hamutuk ho nia no Xanana Gusmão, ita rezolve problema ita-nia ekonomia momentu ne’ebá diak tebes karik ita sukat hosi períodu 2008-2012. Kompara ho tinan 2021, ita-nia ekonomia tun liu,” ekonomista ne’e esplika.

 Iha biban ne’e, João Saldanha afirma nia razaun la kandidata an ba Prezidente Repúblika tinan 2022-2027, tanba nia foku liu oinsá atu dezenvolve João Saldanha University (JSU) sai Universidade ne’ebe kualifiladu iha Timor-Leste.

Nune’e mós, nia fó parabéns no susesu ba kandidatu Prezidente Repúblika períodu 2022-2027 hamutuk na’in-16 ne’ebe daudaun ne’e halo hela atividade kampaña eleitorál hodi konkore iha eleisaun prezidensiál 2022.

“Husu ba sira kontinua mantein estabilidade no susesu ba ita-nia kandidatu Prezidente Repúblika sira,” nia hateten.

Jornalista : Natalino Costa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here