Vendedór ambulante fa’an hela sasán. Imajen/Espesiál

DILI, 05 marsu 2022 (TATOLI)—Vise Ministru Turizmu Komersiu Industria (MTKI), Domingos Lopes Antunes, informa tempu badak MTKI sei apoia negosiante ambulante sira-ne’ebé faan sasán iha dalan ninin tanba daudaun ne’e iha ona faze diskusaun.

Notísia Relevante: MTKI rekolla dadus provizóriu negosiante ambulante hamutuk 100-resin

“Iha tinan kotuk ita mós rejistu ba ita-nia negosiante ambulante sira kuaze 200 mak rejistu ona iha MTKI. Objetivu ida ita halo atu tulun negosiante ambulante sira-ne’ebe faan iha dalan ninin, atu sira bele halo sira-nia negásiu ho di’ak. Tanba ne’e, daudaun ne’e ami iha ona faze diskusaun hela hodi buka dalan, sá polítika mak ita bele implementa nune’e bele fó moris dignu ba negosiante ambulante sira,” Governante ne’e hateten ba Agência TATOLI, iha nia knar fatin Mandarin, Dili, sábadu ne’e.

Tuir nia, Governu iha obrigasaun boot kria polítika hodi akomula negosiante ki’ik sira, nune’e sira bele halo negósiu ho dignu iha sira-nia rain rasik, tanba sira mós iha direitu hodi halo atividade ho dignu, entaun iha tempu badak Governu sei ko’alia ho sira ho sá polítika mak bele insentiva sira, nune’e sira bele sobrevive iha sira-nia atividade negósiu ne’e rasik.

 Daudaun ne’e, negosiante ambulante barak mak la hatene maneira oinsá mak atu dezenvolve sira-nia negósiu ho di’ak, entaun Governu iha polítika fó fasilidade no garantia kréditu no ida seluk mak programa planu negosiu inovativu.

“Ita bele apoia ba ita-nia negosiante sira, ha’u hanoin hanesan programa kompetisaun planu negósiu inovativu ne’e dalan di’ak ba negosiante ambulante sira envolve sira iha programa ne’e, hodi ita bele haree sira-nia kreatividade. Ha’u hanoin sira-ne’e kreativu, Governu durante ne’e seidauk apoia ka insentiva ho di’ak. Tanba ne’e ami sei haree hodi diskuti saida mak ita bele apoia ba sira,” nia dehan.

Iha tinan kotuk, nia dehan, Sekretária Estadu Kooperativa (SECoop, sigla portugés) fó ona apoiu ba negosiante ambulante sira ho karosa hodi fasilita sira-nia negósiu loro-loron nian.

“Tanba ne’e, ami mos sei kria polítika ida hodi tulun mós ita-nia maluk negosiante ambulante sira-ne’e, nune’e sira bele halo sira-nia atividade negósiu ho dignu,” nia hateten.

 Jornalista : Natalino Costa

Editór     : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here