Programa Nasaun Unida ba Dezenvolvimentu (PNUD), serbisu hamutuk ho STAE no CNE sábadu ne'e, hala'o programa ida kona-ba “Joven Vota" iha Timor Plaza. Imajen Tatoli/Cidalia Fátima.

DILI, 5 marsu 2022 (TATOLI) – Sekretariadu Tékniku Administrasaun Eleitorál, Komisaun Nasionál Eleisaun (CNE, sigla portugés) hamutuk ho Programa hosi Nasaun Unida ba Dezenvolvimentu (PNUD), enkoraja joven sira atu partisipa iha eleisaun prezidensiál.

Programa Nasaun Unida ba Dezenvolvimentu (PNUD), sábadu ne’e, hala’o eventu kona-ba “Joven Vota” iha Timor Plaza atu hasa’e koñsementu iha inkluzaun no informasaun ba partisipasaun joven sira iha eleisaun prezidensiál 2022-2027.

Objetivu hosi programa ne’e atu promove partisipasaun joven sira, liuliu feto no ema ho defisiénsia iha eleisaun prezidensiál iha loron 19 marsu 2022.

Tanba alvu importante ba votante sira mak joven ho idade entre tinan 17-25 no atividade edukasionál to’o aumenta sira-nia matenek no kompreensaun atu partisipa iha eleisaun sira tuir mai.

Reprezentante PNUD iha Timor-Leste, Lazima Onta, hateten, programa ne’e importante ba persentajen partisipasaun joven sira iha eleisaun prezidensiál ho seguru, informadu no inkluziva.

“Tanba ne’e ohin ami hamutuk ho STAE no CNE atu hasa’e votante sira-nia koñesimentu atu vota ho seguru iha eleisaun prezidensiál ne’e. Ha’u hein katak Governu Timor-Leste hamutuk ho Governu Japaun bele enkoraja eleitór joven sira hodi partisipa iha eleisaun prezidensiál 2022,” reprezentante UNDP hateten iha Timor Plaza, sábadu ne’e.

Vise-Embaixadór Japaun iha Timor-Leste, Kazumi Yamada, enkoraja joven sira atu partisipa másima iha eleisaun prezidensiál 2022-2027.

“Ha’u esperu ho serbisu konjunta Governu Timor-Leste no Governu Japaun sei bele enkoraja ita-nia eleitór joven sira hodi partisipa iha eleisaun prezidensiál 2022 ne’e tanba sira-nia votu mak sei determinante ba nasaun,” nia enkoraja.

Prezidente CNE, José Belo,  enkoraja joven sira atu partisipa iha eleisaun no vota tuir idak-idak nia hakarak maibé tenke ho konsiénsia tanba joven mak determina sé mak sai Prezidente Repúblika ba tinan 2022-2027.

“Tanba ne’e joven sira labele lakon tempu ba oportunidade ida-ne’e hodi luta no bele dezenvolve rai ida-ne’e ba futuru. Ita la halo polítika loron-loron maibé imi halo polítika iha loron 19 marsu hodi deside ho sekretu ba kandidatu ne’ebé tuir imi rasionál,” nia dehan.

Diretór Jerál STAE, Acilino Manuel Branco, agradese tanba inisiava ba programa ida-ne’e sai indikadór ida ba demokrasia mak eleisaun no partisipasaun joven ida nian mak sai kualidade iha demokrasia.

“Ohin loron ita iha prosesu kampaña eleitorál maibé kampaña ida oinsá ema atu partisipa ka joven partisipa mak ita hotu hatene joven nia papél importante ba kontestu Estadu tomak. Tanba ita atu sukat no garante eleisaun nia kualidade mak tenke iha partisipativu joven nian no involvimentu ita hotu nian,” Branco hateten.

Dadus estatístika STAE nian hatudu katak, pursentu ne’ebé boot hafoin resensia no atualizadu ne’e iha liu 34% mak idade joven hela (idade 17-35). Ida-ne’e mak partisipa hotu iha eleisaun mak hanoin katak taxa partisipasaun sei aas liután.

“Tanba ne’e ha’u husu ita boot sira atu kontribui tanba joven mak promotór no oinsá tulun hodi ema hotu-hotu bele partisipa iha eleisaun,” nia dehan.

Jornalista   : Osória Marques

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here