Kandidatu Prezidente Repúblika períodu 2022-2027 ho númeru sorteiu 16, Mariano Assanami Sabino Lopes, hala’o kampaña iha Covalima iha sábadu (05/03). Imajen Tatoli/Celestina Teles.

COVALIMA, 05 marsu 2022 (TATOLI)—Kandidatu Prezidente Repúblika períodu 2022-2027 ho númeru sorteiu 16, Mariano Assanami Sabino Lopes, hateten povu fó fiar sai PR mak nia sei propoin ba ezekutivu hodi atrai investidór estranjeiru mai investe iha Timor-Leste, atu hasa’e idozu sira-nia subsidiu hosi $30 to’o $100 kada fulan.

Kandidatu Prezidente Repúblika períodu 2022-2027 ho númeru sorteiu 16, Mariano Assanami Sabino Lopes, hala’o kampaña iha Covalima iha sábadu (05/03). Imajen Tatoli/Celestina Teles.

“Sai Prezidente Repúblika, politika esterna leno-an nafatin ba ekonomia rai-laran, atrai investidór mai iha Timor-Leste, hatama osan hodi hasa’e profesór, médiku, seguransa, ferik-katuas sira-nia osan ne’ebé ita konsagra iha konstituisaun. Ita tau osan $30 ba $50, se osan iha hasa’e ba $80 to’o 100, nune’e ferik katuas sente sai éroi ba rai ida-ne’e,” Assanami hato’o lia hirak ne’e liuhosi kamapaña eleitorál iha Kampu Ladi, Covalima, sábadu ne’e.

Antes ne’e, idozu sira simu subsídiu fulan ida $30 no foin lalais halo ona alterasaun hodi hasa’e subsidiu ba idozu sira kada fulan ida simu $50, maibé bainhira povu fó fiar ba nia sai Prezidente Repúblika mak nia hakarak hasa’e subsídiu ferik katuas nian.

Aleinde hasa’e saláriu ba funsionáriu no ba idozu sira, kandidatu PR hosi Partidu Demokrátiku (PD) ne’e hakarak muda líder juventude uluk, hasoru foinsa’e milineál tenke fó esperansa ba jerasaun foun sira.

Kandidatu ne’e mós promete sei dignifika lider nasionál no fó dalan ba joven sira tanba ezije kampu servisu, nune’e bele dezenvolve mós setór importante sira hanesan saúde, edukasaun no agrikultura.

“Ho nune’e, ita forma ita-nia dimensaun importante ba sosiedade foun Timor ida-de’it hanesan Dimensaun fíziku, mentál, espirituál no intelektuál bele kompete iha rejiaun ida-ne’e,” nia dehan.

Assanami mós afirma, odamatan Palásiu Prezidente Repúblika iha Bairru Pite sai hanesan povu nia palásiu hodi kontrola mós negosiante sira-ne’ebé fila-liman hodi faan katupa, ikan, negosiante ambulante iha tasi-ibun no bainhira mosu inundasaun karik sei fó solidariedade ba povu sira.

Konsilleiru Kandidatu PR, Adriano do Nascimento “Loro Mau”, hateten kandidatu PR Assanami sei hala’o servisu tolu hanesan problema líder no lideransa ba nasaun, tanba kredibilidade mihis ba beibeik halibur líder nasionál no hasa’e taxa domestika iha rai-laran.

Prezidente ekipa susesu kandidatu PR Mariano Assanami Sabino Lopes iha Covalima, Julião Áraujo, hateten ema hotu no organizasaun sira hodi bele fó vitória ba iha eleisaun prezidensiál 2022 ne’ebé sei hala’o eleisaun iha 19 marsu 2022.

“Maske hasoru difikuldade oioin maibé sei la hamate ekipa hala’o serivu makaas hodi konkretiza kandidatura nia mehi. Ami komprometidu sei konkretiza kandidatu nia mehi atu sai prezidente repúblika ba períodu 2022-2027,” nia hateten.

Tuir oráriu ne’ebé CNE aprova kandidatu prezidente Repúblika ho númeru sorteiu 16 ne’e hahú kampaña iha tuku 15h00 lorokraik no ramata iha tuku 18h00 kalan, maibé kandidatu hala’o kampaña tarde uitoan no hahú kampaña ho tipu públiku hahú fali iha tuku 16h45 no ramata iha 18h30

Iha Kampaña eleitorál ba loron dahaat ne’e hetan partisipasaun másimu hosi militante, simpatizante no aopiante sira iha munisípiu Covalima.

Iha komísiu ne’e hetan supervizaun hosi Komisaun Nasionál Eleisaun, Provedoria Direitu Umanu no Justisa no observadór internasionál hodi haree prosesu hotu, inklui Lei Eleitorál nian hodi bele fó susesu ba iha kampaña tinan ida-ne’e.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here