Vítima ne’ebé hetan asidente iha área Laivai, Lautém. Imajen espesiál.

DILI, 05 marsu 2022 (TATOLI) – Asidente tráfegu akontese iha Laivai, Postu Administrativu Lautém, Munisípiu Lautém, rezulta apoiante hosi kandidatu Prezidente Repúblika, Tenente Jenerál Reformadu Lere Anan Timur mate no restante kanek.

Karreta ne’e baku-fila hafoin fila ba aldeia Samari, suku Ililae, Laivai, postu administrativu Lautém, to’o iha dalan hetan asidente hodi rezulta ema na’in-ida mate fatin, na’in-rua kanek todan no oras ne’e halo hela tratamentu iha Hospital Rejionál Eduardo Ximenes (HorEX) Baucau no balun kanek kmaan hosi ema na’in 30-resin.

Komandante Munisípiu Lautem, Superintendente Polísia, António Rego Fernandes, informa, iha duni asidente ida-ne’ebé maka akontese karreta ida tula ema 30- resin, atu partisipa atividade kampaña kandididatu Prezidente Republika, Tenente Jenerál Reformadu Lere Anan Timur iha Lautém.

Hafoin asidente ne’e, komandu PNTL Munisípiu Lautém simu informasaun maizumenus tuku 22:00 kalan, iha loron 4 marsu 2022.

“Asidente karreta ida ho xapa-matríkula 60.071, lori ema 30-resin, atu mai simu ita-nia kandidatu Prezidente Republika Tanente Jenerál Lere, depois fila hosi Baucau. Sira atu simu iha área Laivai nian. Hafoin ida-ne’e, apoiante sira atu fila-fali, derrepente iha Laivai, sira hetan asidente karreta baku-fila hodi rezulta na’in ida mate, sira seluk balun kanek todan no balun kanek kmaan,”  Komandante Munisipiu Lautem, Superintendente Munisípiu Lautem informa ba Agência TATOLI liuhosi telefónika, sábadu ne’e.

Nia dehan, iha área ne’ebé hetan asidente dalan subida no dalan ne’e  foin fui ho simentu.

“Kondutór parese nia lakon kontrolu ba travaun, entaun akontese asidente ne’e. Maibé parte polísia daudaun sei halo hela investigasaun ba  kazu ne’e, atu hatene lolos motivu loloos hosi akontesimentu ne’e rasik,” nia informa.

Diretór Saúde Munisípiu Lautém Anastacio da Cruz,  hateten, asidente ne’e akontese iha área Ligadiga, Laivai, Lautém, hafoin remata akompaña kandidatu Prezidente Repúblika Lere Anan Timur iha tuku 22:00.

“Sira halo akompañamentu kandidatura númeru sorteiu 8 Lere Anan Timur iha Raumoco, fila mak hetan dezastre iha área Laivai,” Diretór Saúde Lautém informa ba Agência TATOLI liuhosi telefónika, sábadu ne’e.

Ho akontesimentu ne’e rezulta vitíma nain-lima mak kanek, na’in-tolu kanek, halo ona tratamentu iha Postu Saúde Lautém no fila ona ba uma, enkuantu na’in-rua seluk tenke evakua ba Hospital Rejionál Eduardo Ximenes (HorEX) Baucau tanba kanek todan. Hosi asidente ne’e rezulta na’in-ida mate kedas iha fatin akontesimentu.

Tuir informasaun ne’ebé Agência TATOLI rekolla, kondutór ho naran Armando da Conceição (24), Osório dos Santos mate fatin, Agustina Pereira tohar iha kidan, Faustina dos Santos tohar iha ain parte-loos, Regina dos Santos hetan kanek iha rento’os parte-loos no Agostinho Maria Ximenes hetan pankada iha hirus-matan.

Jornalista   : Natalino Costa/Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here