Ai-figueira

OÉ-CUSSE, 04 marsu 2022 (TATOLI) – Grupu agrikultór iha  Autoridade Rejiaun Administrativa Espesiál Oé-Cusse Ambeno (RAEOA) hahú dezevolve ai-figueira tanba iha poténsia ekonómika tanba bele prodús ba xá no tua inklui kura moras.

Ai-figueira ne’e hanesan planta, jeralmente árvore, mai hosi família Moraceae (naran sientífiku). Ai-figueira ne’e iha espésie hamutuk 755 espalla iha mundu, espesialmente iha rejiaun klima tropikál no sub-tropikál ne’ebé iha bee. Ai ne’e maiór iha reinu vegetál. Ai-figeira mai hosi Médiu Oriente no oras ne’e espalla ona iha nasaun barak inklui rai sira iha Europa.

Nune’e iha loron-sesta ne’e Autoridade Rejiaun Administrativa Espesiál Oé-Cusse Ambeno (RAEOA) lideradu Arsénio Paixão Bano, hamutuk ho empreza Figos Sol Nascente, apoia grupu agrikultór sira atu dezenvolve ai-figeira iha rejiaun ne’e.

Diretór Figos Sol Nascente, Hugo Natalino Conoel Lebre, esplika, ekipamentu ne’ebé apoia ba grupu agrikultór sira, serbisu hamutuk ho alumni hosi Japan International Cooperation Agency (JICA).

Ekipamentu ne’ebé apoia ba grupu agrikultór sira mak hanesan; mangeira, sanyo, polypipe, ba grupu neen (6) hosi sub-rejiaun Nítibe, Oésilo no Pante Makasar.

Ai-figeira ne’ebé kuda iha Oemolo, suku Lifau, RAEOA. Imajen Tatoli/Abílio Elo Nini.

“Ai-Figeira ne’e poténsia boot tanba ajuda agrikultór sira atu dezenvolve, entaun ita garante kuantidade matéria prima atu halo produsaun iha rai-laran, nune’e presiza insentiva no sensibiliza agrikultór-sira, nu’udar sira-nia mainset atu dezenvolve, nune’e iha futuru ai-figeira sai produtu poténsia ba agrikultór Oé-Cusse,” Hugo Natalino Conoel Lebre, informa ba Agência Tatoli iha suku Lifau, Oé-Cusse.

Nia fó-sia katak, prezensa produtu ai-figeira iha RAEOA foin mak tinan-rua no envolve ona agrikultór-sira hamutuk grupu neen ho benefisiáriu na’in-135 mak hahú dezenvolve iha rejiaun ne’e.

“Tanba produtu ne’e bele reforsa poténsia ekonomia, tanba nia funsionamentu bele halo produsaun ba tua, xá, bele kura ba moras mí-fatuk, liman-ain sín, hatún bokur, moras stroke, bele halo ba marmalada, bele halo ba doxi,” nia katak.

Ai-figueira nia tahan no fuan.

Nia infroma, ai-figeira halo ona produsaun ba xá, dadaun ne’e tama ona merkadu nasionál, hanesan iha Timor Plaza, supermerkadu Kmanek, Pateo, Dili Mark, Bemorin inklui mós munisipiu sira.

Maibé pratikamente produsaun xá ne’e fa’an iha Timor laran tomak, tanba produtu ne’e la’os xá de’it, maibe iha temperu mós fa’an hotu, tanba ai figeira ne’e halo produsaun hotu-hotu no produsaun ne’e hahú ona iha 2014.

Prezidente Autoridade RAEOA, Arsénio Paixão Bano, enkoraja grupu agrikultór-sira aproveita hodi dezenvolve ai-figeira, tanba iha futuru autoridade sei identifika sentru permanente hodi dezenvolve iha territóriu Oé-Cusse.

RAEOA daudaun ne’e iha ona grupu-neen (6) mak dezenvolve ona produtu ai-figeira iha sub-rejiaun Oésilo, dezenvolve iha suku Usitasae envolve grupu rua (2), iha sub-rejiaun Nítibe grupu ida (1) ho medida metru 50.

Nune’e mós iha sub-rejiaun Pante Makasar, dezenvolve iha suku Costa , aldeia Kutete grupu ida (1) ho médida metro 50, iha suku Lifau envolve grupu tolu ho medida ektare haat (4).

Jornaalista : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here