Sosiedade sivíl Timor-Leste husu Estadu fó hanoin ba Konsellu ONU atu hakotu funu entre Rusia-Ukraina. Imajen/Espesiál.

DILI, 04 marsu 2022 (TATOLI)—Sosiedade Sívil Timor-Leste ne’ebé hamahon an iha Forum Organizasaun Naun Governamentál Timor-Leste (FONGTIL), husu ba Estadu Timor-Leste atu haruka karta formál ba Konsellu Nasaun Unida hodi hakotu funu entre Rusia ho Ukraina.

“Ita haree katak Timor-Leste mós ratifika konvensaun internasionál sira, ne’ebé iha obrigasaun Estadu atu hato’o nia pozisaun ba iha situasaun ida-ne’e, hodi nune’e Estadu hasai nia karta formál ruma, hodi husu Konsellu Seguransa Nasõens Unidas nian atu apoiu ba dame liuhosi forsa manutensaun pás nian hodi hakotu funu entre Rusia no Ukraina,” Koordenadór Rede Defensória Direitus Humanus (RDDH), Inocensio Xavier, hateten liuhosi Komunikadu Imprensa ne’ebé hala’o iha salaun FONGTIL, sesta ne’e.

Tuir nia, funu ne’e lori prejuizu tanba Timor-Leste nia esperiénsia tinan 24 moris iha situasaun ne’ebé mizeravel liu, entaun ema lakohi iha rai ida hakmatek ne’e atu ninia povu no komunidade internasionál sira iha situasaun ida-ne’e.

“Tanba Timor-Leste nu’udar elementu ida hosi komunidade internasionál, iha obrigasaun no dever morál atu halo ida-ne’e mós ba país sira seluk. Nune’e, ami-nia hanoin mak atu kontribui ba diálogu no pás,” nia dehan.

Aleinde ne’e, sosiedade sívil sira mós kontesta no kondena aktu agresivu militár hala’o hosi país Rusia ne’ebé invade soberánia no liberdade povu Ukraina, tanba ne’e Sosiedade Sívil Timor-Leste husu ba Konselu Seguransa Nasaun Unida hodi halo intervensaun tantu asaun diplomátiku no asaun militár, hodi prevene aktu agresivu militár Rusia ba povu no soberánia Ukraina.

Sosiedade Sívil Timor-Leste ne’e mós husu ba Organizasaun Sosiedade Sívil iha mundu tomak hodi hahú kampaña Cesar Fogu ba Iinha militár entre países Rusia no Ukraina, hodi nune’e labele konvida prejuiju no sofrimentu ne’ebé grave ba povu Ukraina no povu Rusia.

Hosi ne’e, Organizasaun Sosiedade Sívil Timor-Leste fiar katak, Estadu Rusia no Estadu Ukraina sei iha oportunidade no boa-vontade konvida malu no tu’ur hamutuk hodi ko’alia ho ulun malirin no fuan boot atu habadak funu ne’ebé iha, hodi termina sofrimentu povu rai rua (2) iha situasaun ida-ne’e.

“Sosiedade Sívil Timor-Leste ninia pozisaun ida-ne’e obdese ba orden hosi tratadu internasionál ba deklarasaun universál ba direitu umanu. Tanba, dame ambiénte ida-ne’ebé ema hotu presiza no funu só lori sofrimentu no prejuiju ba povu ninia vida, liu-liu ba labarik kiik, ema ho defisiénsia, feto no ferik ho katuas sira. Tanba ne’e, Sosiedade Sívil Timor-Leste dala ida tán, konvida elementu hotu iha mundu hodi apoia Estadu Rusia no Estadu Ukraina hodi termina situasaun in-kondisivu ida-ne’e liuhosi dalan diálogu,” nia dehan.

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here