Komandante PNTL Munisípiu Bobonaro, Superintendente Antoninho ‘Mauluta’. Imajen Tatoli/Sérgio da Cruz.

BOBONARO, 04 marsu 2022 (TATOLI) – Polísia Nasionál Timor-leste (PNTL) Munisípiu Bobonaro, husu ba apoiante no militante kandidatu Prezidente Repúblika (PR) na’in-16 atu nafatin kumpre no respeita regra ne’ebé prevista iha Dekretu-Lei númeru 6/2003, 6 abríl kona-ba Kógidu Estrada nune’e evita asidente tráfegu.

Komandante PNTL Munisípiu Bobonaro, Superintendente Atoninho Mauluta, informa, apoiante sira presiza kumpre regra atu nune’e durante prosesu akompaña kandidatura to’o tama iha fatin destinasaun kampaña eleitorál labele akontese asidente ruma.

“Ami husu ba kualkér militante no apoiante kandidatu sira tantu hosi partidu ka independente ninian, banihira halo kampaña karik tenke la’o ho displina, la’o kumpre nafatin lei tránzitu (Dekretu Lei Kódigu Estrada. Partisipa karik tenke la’o-tuir orientasaun kada ekipa susesu no komisaun sira nune’e buat hotu-hotu bele la’o ho di’ak,” nia informa ba jornalista sira, iha Maliana, sesta ne’e.

Komandante PNTL Munisípiu Bobonaro ne’e husu apoiante no militante sira tenke kumpri Dekretu Lei Kógidu Estrada, liuliu artigu 27 kona-ba limita jerál ba velosidade ho ninia sansaun sira.

Superintendente ne’e afirma, atu asegura kampaña eleitorál ne’e la’o ho susesu importante liu mak apoiante no militante sira-ne’ebé konduz motorizada tenke uza kapasete, atubele prevene no asegura isin-lolon bainhihira akontese asidente tráfegu ruma iha lurón públiku.

Daudaun ne’e membru PNTL Bobonaro hosi seksaun tránzitu no forsa rezerva sira preparadu atu halo seguransa iha Fatin hotu-hotu hodi kontrola movimentasaun transporte públiku iha atividade kampaña eleitorál.

“Iha balun ne’ebé kontra regra lei tránzitu nian, liuliu sira-ne’ebé uza motorizada kanu-resin, ita sei foti hotu mai iha komandu prosesa sira tuir lei tránzitu ne’ebé vigora ona iha ita-nia rai, tanba ne’e di’akliu tenke lei kódigu estrada,” nia katak.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here