Diretòr Apoiu ONG Covalima, Agostinho Mendonça. Imajen Tatoli/Celestina Teles.

COVALIMA, 04 marsu 2022 (TATOLI)–Administrasaun Munisípiu Covalima (AMC) liuhosi Dirasaun ApoiuOrganizasaun Naun Governamentál (ONG) lokál, internasionál no grupu komunitária hamutuk 51 ne’ebé mak atu implementa sira-nia programa iha Covalima.

“Tuir dadus hosi AMC liuhosi dirasaun apoiu ONG lokál no internasionál hamutuk 51 ne’ebé eziste iha munisípiu Covalima hodi implementa sira-nia programa iha munisípiu Covalima,” Diretór Apoiu ONG no Grupu Komunitária, Agostinho Mendonça, informa ba Agência Tatoli iha nia knar fatin, Kampung Baru, sesta ne’e.

Hosi ONG 51 ne’e kompostu hosi ONG lokál 27 no ONG lokál ativu hamutuk 18, ONG internasionál haat (4), grupu komunitária 20-resin ne’ebé hala’o sira-nia atividade hanesan haki’ak ikan, animál no atividade kuda modo.

ONG internasionál ne’ebé eziste iha Covalima mak hanesan UNDP apoiu administrasaun ba programa desentralizasaun, Care Internasionál implementa programa kona-ba saúde liu-liu kona-ba COVID-19 ne’ebé implementa iha postu administrativu Fohorem no Fatumean, World Vision implementa programa violénsia ba jeneru, ai-han no saúde di’ak no Mercy Corps toma konta ba redusaun risku dezastre iha postu administrativu Maucatar.

ONG nasionál ne’ebé eziste iha Covalima mak Cruz Vermela Timor Leste (CVTL) implementa programa saúde, jestaun dezastre, juventude, organizasaun dezenvolvimentu, Asosiasaun Rede Covalima implementa programa advokasia kona-ba transparansia no akuntabilidade, Centro Comunidade Covalima (CCC) halo advokasia kona-ba saúde no edukasaun no ONG sira seluk tán.

Dirasaun ONG ne’ebé eziste iha Covalima foin hahú hala’o servisu fulan jullu tinan 2021, no durante ne’e seidauk fó apoiu fundu ba ONG sira tanba laiha orsamentu.

“Ha’u-nia servisu atu fó apoiu ba ONG ne’ebé mak eziste iha Covalima, maibé durante ne’e ami seidauk apoiu fundu ba ONG ne’ebé eziste iha Covalima,” nia hateten.

Ezisténsia dirasaun ida-ne’e la fó apoiu orsamentu ba ONG sira tanba laiha orsamentu, maibé dirasaun ne’e mós buka dalan hanesan ONG Centru Comunidade Covalima (CCC) hetan apoiu fundu $5000 hosi Gabinete Primeiru-Ministru Apoiu ba Sosiedade Sivíl ne’ebé implementa iha postu administrativu sira iha Covalima.

 Jornalista : Celestina Teles

Editor        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here