Kampus IOB, Fomentu, Dili. Imajen/IOB

DILI, 04 marsu 2022 (TATOLI)–Reitór Institute of Business (IOB), Pedro Miguel de Fátima Gonçalves Barreto Ximenes, garante fulan ne’e sei realiza akordu kréditu ho Banku Nasionál Komérsiu Timor-Leste (BNCTL) tanba aprezenta ona proposta kréditu ba kestaun tolu.

“Ami-nia proposta kréditu ne’e atu halo buat tolu hanesan, realiza konstrusaun fíziku edifísiu foun iha Maliana, sosa ekipamentu sala aula no hadi’a laboratóriu rua iha kampus sentrál,” Reitór IOB informa ba Agência TATOLI, iha kampus IOB, Fomento, sesta ne’e.

Notísia relevante: MESSK no BNCTL assina akordu Liña Kréditu” Ensinu Superior Kualidade+”

Proposta kréditu ne’ebé IOB submete ba BNCTL ho montante $590.000 resin, nune’e fulan ne’e nia laran bele halo ona akordu ho banku hodi bele aselera prosesu.

Ba kestaun ne’e, Pedro garante akordu kréditu ne’e bele realiza lalais ho BNCTL, tanba IOB mak sai instituisaun dahuluk hosi Instituisaun Ensinu Superior sira seluk hodi aprezenta proposta kréditu.

Enkuantu, planu konstrusaun fíziku kampus IOB iha Maliana, la’ós atu konstrui edifísiu foun, maibé presiza tan apoiu orsamentu atu finaliza edifísiu ne’e.  

“Edifísiu ne’e rasik atinje ona 80% resin. Tanba ne’e ami presiza tan de’it orsamentu metade atu finaliza konstrusaun fíziku,” nia akresenta.

Antes ne’e, iha loron 25 janeiru 2022, Ministériu Ensinu Superior Siénsia no Kultura (MESSK) no BNCTL asina akordu ba implementasaun programa liña kréditu ba Ensinu Superiór Kualidade+, nune’e garante kualidade universidade privadu sira.

Bainhira universidade privada akreditada hamutuk 16 hahú halo ona kréditu, Governu sei responsabiliza selu juru balun durante tinan-tolu to’o lima.

Nune’e, BNCTL aplika funan 8%, entaun 3% ne’e Governu maka responsabiliza nu’udar subsídiu ne’ebé fó hanesan garantia ida, enkuantu seluk responsabiliza hosi instituisaun sira ne’ebé sai kreditór.

Ba programa ne’e, Governu prevee ona millaun $5 iha BNCTL atu garante kréditu finanseiru.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here