Komandante PNTL munisípiu Dili, Superientendente Xefe Polisia, Henrique da Costa. Imajen TATOLI/Francisco Sony

DILI, 04 marsu 2022 (TATOLI)— Tuir dadus hosi Komandu Polisia Nasionál Timor-Leste (PNTL) Munisípiu Dili, iha fulan fevereiru ne’e, rejista asidente tráfegu hamutuk 87, hosi númeru ne’e ema na’in-tolu mak mate.  

“Totál númeru asidente tráfegu iha fulan fevereiru ema nain-87, hosi númeru ne’e nain-tolu maka lakon vida. Tanba ne’e, ami kontinua husu ba motorista sira atu atensaun ba kondisaun motór no karrreta nian bainhira halo viájen,” Superintendente Xefe, Henrique da Costa, hateten ba jornalista sira iha edifísiu Komandu Munisípiu Dili, sesta ne’e.

Superintendente Xefe Henrique, informa iha fulan-fevereiru ne’e mós konsege rekolla reseita ba kofre Estadu hamutuk $24.432.

“Reseita ne’e ita rekolla hosi operasaun ne’ebé halo liuhosi apreensaun motór 612, hosi númeru ita nia infratór sira konsege selu hotu ona koema hamutuk $24.432,” Superintendente Xefe, Henrique da Costa, hateten ba jornalista sira iha edifísiu Komandu Munisípiu Dili, sesta ne’e.

Komandante ne’e informa Polísia Tránzitu deteta maioria infratór sira la lori dokumentu motór nian, la monta espellu, laiha xapa matríkula no laiha karta kondusaun.

“Ita foti motór mai para iha Komandu Dili no ita haruka infratór sira ba selu koema, molok sira mai foti fali sira nia motorizada,” nia afirma.

Nune’e, Polísia Tránzitu Dili kontinua halo operasaun pasa revista ba motor no karreta tuir politika no orientasaun hosi Komandu Jerál nian.

Entertantu, inísiu fulan-marsu ne’e, PNTL Dili hala’o operasaun ka pasa revista konsege halo apreensaun ba motór 79 no karreta taxi ida ne’ebé kondutór laiha karta kondusaun no laiha xapa mátrikula.

Operasaun pasa revista ba viatura sira ne’ebé hala’o hosi Komandu PNTL Dili hetan apoia másimu hosi Unidade Espesiál Polísia (UEP), BOP, UPM no UPF inklui serbisu sekretu sira.

Notísia relevante: Asidente tráfegu hamate ema na’in-12 iha janeiru to’o outubru

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here