Veterana Maria Rosa da Câmara ‘Bisoi’ (faru-mutin; tuur iha liman karuk) hamutuk ho nia maluk veterana seluk hodi suku hela membru FALINTIL sira-nia farda ne’ebé naklees ka ku’ak. Imajen/Espesiál.

DILI, 03 marsu 2022 (TATOLI)—Prezidente Interina Rede Feto, Guizela Carvalho, hateten iha selebrasaun Loron Nasionál Veteranu ne’e timor-oan tenke valoriza no respeita veterana sira-nia kontribuisaun ba Timor-Leste nia independénsia.

Notísia Relevante: Governu deside la selebra “Loron Nasionál Veteranu” tanba kampaña eleitorál

“Ohin ita-nia veteranu no veterana nia loron importante tanba ne’e ami hosi Rede Feto Timor-Leste husu ita hotu atu valoriza no respeita kontinuasaun feto maluk ne’ebé luta ba ukun rasik an ne’e,” Guizela Carvalho hateten ba Agência TATOLI, via telefónika, kinta ne’e.

Tanba, nia hateten, liuhosi feto maluk ka veterana sira-nia sakrifisiu no kontribuisaun mak povu no rai Tior-Leste hetan independénsia entaun tenke fó onra no dignifika sira nafatin.

Prezidente interina ne’e husu ba Estadu Timor-Leste atu nafatin tau matan ba veteranu sira liu-liu veterana ne’ebé sei iha mukit no sofre nia-laran.

Iha tinan ida-ne’e, povu ida-idak selebra loron nasionál veteranu (03 marsu) iha uma de’it maibe tenke iha konsiénsia katak loron ne’e importante, nune’e hanoin hikas eroi sira-ne’ebé mate tanba rai ida-ne’e, hodi fó omenajen atu sira bele moris di’ak iha mundu seluk.

Loron Nasionál Veteranu ne’ebé selebra iha loron 03 fulan-marsu ne’e, ninia abut mai hosi, bainhira Kay Rala Xanana Gusmão ho Ma’Huno Bulerek Carathayano (Bucar) reorganiza Luta Libertasaun Nasionál iha territóriu tomak iha 3 Marsu 1981.

Loron Nasionál Veteranu 03 marsu konsagra ona husi Estadu Timor-Leste liuhosi Lei Nú. 3/2016, nu’udár Loron Veteranu sira-nian. Data istórika ne’e liga ba Konferénsia Nasionál FRETILIN nian ne’ebé hala’o iha Maubai, Viqueque. Iha loron 03 marsu, ho orientasaun hosi membru CCF, sobrevivente rua, Xanana Gusmão no Ma’Huno, konfresista sira hili membru CCF na’in-sia (9) foun tan hodi foti desizaun importante lubuk ida, hodi reorganiza ita-nia luta libertasaun nasionál iha territóriu tomak. Rezisténsia Armada moris fila-fali iha ai-laran.

Selebrasaun dahuluk Loron Veteranu akontese iha tinan 2017 ne’ebé prezide hosi Prezidente Repúblika, Jenerál Taur Matan Ruak.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here