Primeiru Ministru (PM) Taur Matan Ruak. Imajen Tatoli/Francisco Sony

DILI, 03 marsu 2022 (TATOLI)— Primeiru Ministru, Taur Matan Ruak, hateten nia parte sei permite membru Governu ne’ebé hakarak rezigna-an hosi nia kargu tanba nomál iha prosesu governasaun iha país demokrátiku.

“Ha’u hanoin ne’e di’ak liu, iha dinámika prosesu dezenvolvimentu no prosesu governasaun ne’e di’ak.  Se ita boot sira haree Prezidente Repúblika de’it nia mandatu mós tinan lima. Uluk ha’u Prezidente atu halo distituisaun mai ha’u ka impeachment. Ne’ebé kuandu tempu to’o ita ba ita tenke simu ida ne’e ho naturalidade,” PM Taur hateten iha Kuartél Jerál F-FDTL, Fatuhada-Dili, kinta ne’e.

Notísia relevante: Kondisaun saúde, Ministru Justisa Manuel Cárceres husu lisensa ba PM

Xefe Governu hato’o asuntu ne’e hodi responde pergunta jornalista sira kona-ba informasaun ne’ebé espalla iha públiku katak membru Governu balun atu submete karta rezignasaun. 

Nune’e, Xefe Governu ne’e konsidera normál  tanba iha mundu ka nasaun balun nian membru Governu ou Primeiru Ministru ne’ebé la to’o fulan tolu tuun fali hosi nia kargu. Tanba ne’e prosesu sira hanesan ne’e normál ka naturalmente iha país demokrátiku sira.

“Agora, ita mak tenke preparadu atu simu buat sira ne’e ho naturalidade labele hanoin fali prosesu ne’e buat ida que iha mundu seluk ita la toman no preokupa,” Xefe Governu akresenta.

Hatan kona-ba membru Governu nain hira mak hatama ona karta rezignasaun, PM Taur rejeita hodi la fo komentáriu ba kestaun ne’e.

“Ha’u ohin mai partisipa iha palestra ne’e, tuir loloos imi husu ida ne’e, agora imi lori tama ha’u ba fali kestaun seluk, ita hein tempu seluk mak ha’u ko’alia ida ne’e,” Eis Prezidente Repúblika ne’e klarifika.

Entretantu, iha segunda (28/02), Ministru Justisa (MJ), Manuel Cárceres da Costa, hato’o ona pedidu informál ba Primeiru-Ministru (PM), Taur Matan Ruak, katak sei husu lisensa hodi deskansa tanba kondisaun saúde.

Governante ne’e dehan husu autorizasaun ba Primeiru-Ministru atu fó tempu hodi deskansa oituan to’o rekupera tiha mak haree took fali serbisu saida mak bele halo tanba labele avansa bebeik ho moras hodi prejudika serbisu.

“Sesta (ohin) mak ita haree took tanba agora ne’e ha’u sei Ministru hela,” Ministru Justisa, ne’e hateten ba Agência TATOLI, kuarta ne’e.

Maski nune’e, governante ne’e seidauk relata bainhira mak sei hahú lisensa no to’o loron hira tanba sei bazeia ba atestadu médiku, hafoin ne’e sei halo pedidu formál ba Xefe Ezekutivu.

Ba kestaun ne’e, Ministru garante serbisu ministériu nia sei la’o normál tanba sei substitui serbisu hosi Vise-Ministru Justisa, José Edmundo Caetano.

Notísia relevante: Manuel Cárceres halo mudansa ba kargu xefia iha MJ

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here