Komandante PNTL Baucau, Superintendente Xefe António de Sá. Imajen Tatoli/Natalino Belo.

BAUCAU, 03 marsu 2022 (TATOLI) – Polísia Nasionál Timor-Leste (PNTL) Munisípiu Baucau, husu militante no apoiante sira hosi kandidatu Prezidente Repúblika (PR) evita lori arma branka durante períodu kampaña eleitorál.

Komandante PNTL Baucau, Superintendente Xefe António de Sá, husu koordenadór ekipa susesu sira atu kontinua halo koordenasaun, komunikasaun no kolaborasaun ho PNTL.

“Evita mak labele lori kro’at, ita hakarak atu kampaña ne’e la’o ho susesu entaun husu simpatizante sira hotu iha komportamentu di’ak, kuda nafatin espíritu nasionalizmu no patriotizmu iha fuan,” Komandante PNTL Baucau hateten iha Vila Nova, kinta ne’e.

Lei númeru 5/2017 kona-ba arma branka bandu kualkér atividade inklui kampaña eleitorál lori arma branka nomoos utiliza atributu organizasaun arte marsiál no instrumentu ai-moruk droga.

António hatutan, hanesan Baucau iha papél atu kontribui nu’udar responsável no devér atu kuida ambiente pás no estabilidade iha Baucau, liuliu kumpri regra ne’ebé prevista iha Lei Eleitorál ba Prezidente Repúblika.

“Bainhira lori, tenke prosesu tuir lei inklui akordu ne’ebé asina ona hanesan paktu seguransa,” António akresenta.

Baucau sai fatin konsentrasaun hosi munisípiu seluk hanesan Viqueque, Lautém no Manatuto nune’e sai barómetru susesu kampaña eleisaun prezidensiál ba kapital Dili no munisípiu seluk.

PNTL mós destaka ona membru sira iha fatin kampaña tuir kalendariu ne’ebé fó sai ona hosi Komisaun Nasionál Eleisaun (CNE, sigla portugés) nune’e asegura seguransa durante kampaña eleitorál.

Tuir kalendáriu kampaña kinta ne’e, kandidatu na’in-haat hanesan Ramos Horta, Martinho Gusmão, kandidata Maria Ângela Freitas no Isabel Ferreira mak halao kampaña iha Baucau.

“Ita konsentra forsa destakadu sira hotu atu halo prevensaun antes liuhosi seksaun polisiamemtu komunitária, tránzitu, no koordenasaun ho autoridade lokál, lian-na’in no veteranu sira hotu,” António de Sá esplika.

PNTL Baucau husu koordenadór ekipa susesu atu mantein nafatin koordenasaun ho parte seguransa atu mantein ambiente pás no estabilidade iha Baucau.

Jornalista   : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here