Sekretáriu Jerál PD, Antonio da Conceição, deklara liuhosi konferénsia imprensa ba jornalista sira katak Kandidatu Prezidente Repúblika ba periódu 2022-2027 ho númeru sorteiru 16, Mariano Assanami Sabino Lopes la hala’o atividade kampaña eleitorál. Imajen Tatoli/Nelson da Seousa.

DILI, 03 marsu 2022 (TATOLI)—Kandidatu Prezidente Repúblika ba periódu 2022-2027 ho númeru sorteiru 16, Mariano Assanami Sabino Lopes, kinta ne’e, la hala’o atividade kampaña hodi dignifika veteranu no fó onra ba éroi sira iha luta ba libertasaun nasionál.

Atividade kampaña eleitorál ne’e kansela tanba Estadu Timor-Leste deside iha 03 marsu hanesan Loron Nasionál Veteranu.

Sekretáriu Jerál PD, Antonio da Conceição, deklara liuhosi konferénsia imprensa ba jornalista sira katak Kandidatu Prezidente Repúblika ba periódu 2022-2027 ho númeru sorteiru 16, Mariano Assanami Sabino Lopes la hala’o atividade kampaña eleitorál. Imajen Tatoli/Nelson da Seousa.

“Iha loron ida ohin kandidatu PR Assanami laiha atividade kampaña iha munisípiu hotu inklui RAEOA tanba loron ohin dedikadu loron veteranu sira-ne’ebé luta ba indepedénsia Timor-Leste nian. Nune’e, Asanami hakarak diginifika veteranu hotu no fó onra ba erói iha luta libertasaun nasionál,” Sekretáriu Jerál PD, Antonio da Conceição, hateten liuhosi konferénsia imprensa ba jornalista sira, iha sede PD, Colmera, Dili, kinta ne’e.

PD oferese Assanami nu’udar kandidatu nasionál hakarak hakruuk ba veteranu hotu no dignifika erói hotu ninia sakrifísiu iha luta libertasaun, no iha loron nasionál ne’e kandidatura fó onra atu bele ba unidade nasionál hodi hametin situasaun sira-ne’ebé durante ne’e povu hotu halerik.

Loron ohin, nia hateten, kandidatu Prezidente Repúblika períodu 2022-2027 Mariano Assanami Sabino Lopes ho ekipa sei ba presta omenajén iha Jardim dos Herois Metinaro.

“Presta omenajen ne’e, lori espíritu sira-ne’ebé mate ba ninia kandidatura hodi lori fila-fali estabilidade ba rai ida-ne’e, ne’ebé kandidatura tau mós ninia lema ‘Hakarak Timor-Leste Ida Fraternu, Unidu no Solidáriu’ no solidariedade ida-ne’e manifesta mós mai ita importante tebes bainhira dignifika éroi no veteranu sira,” nia dehan.

Nune’e, nia dehan, jerasaun foun bele tane istória luta no sira-ne’ebé sei moris ninia mehi ne’ebé halo ona ba rai ida-ne’e no hakarak hatutan mehi hirak ne’e liuhosi ninia kandidatura.

Hanesan jerasaun kontinuador, Kalohan husu daudaun ne’e iha periódu kampaña nia laran veteranu sira la’o nankari iha territóriu hodi partisipa atu bele fó hanoin no hamutuk fó liman ba malu.

Tuir oráriu kampaña kandidatu PR, Mariano Assanami Sabino Lopes, hala’o abertura kampaña iha loron 02 marsu 2022 iha munisípiu Aileu, no tuir planu iha loron daruak (kinta, 03 marsu) sei hala’o kampaña públiku iha Kampu Futebol Gleno-Ermera iha tuku 14h00-18h00 maibé sei la realiza.

Tuir kalendáriu hosi Sekretáriadu Tékniku Administrasaun Eleitorál (STAE), kampaña eleitorál hahú iha loron 02-16 marsu no eleisaun sei hala’o iha 19 marsu 2022.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here