Kandidatu Prezidente Repúblika periodu 2022-2027, Tito da Costa Cristovão "Lere Anan Timur", realiza kampaña ho tipu komisiu, iha Kampu Eis Merkadu Munisipiu Manatuto, kuarta (02/03). Imajen Tatoli/Francisco Sony.

DILI, 03 marsu 2022 (TATOLI)—Prezidente Komisaun Nasionál Eleisaun (CNE-sigla portugés), José Agostinho da Costa Belo, hateten kandidatu Prezidente Repúblika (PR) balun altera kalendáriu kampaña eleitorál tanba loron feriadu nasionál.

Notísia Relevante: Labarik hatais faru partidu nian tuir kampaña ne’e kontra regra

“Ita-nia kandidatu Prezidente Repúblika balun labele halo kampaña tuir kalendáriu eleitorál ne’ebé ita estabelese tanba balun tenke tuir misa iha kuara-feira sinzas no iha loron 03 marsu ne’e hanesan loron feriadu nasionál hodi selebra Loron Nasionál Veteranu nian,” José Agostinho da Costa Belo hateten ba Agência TATOLI, via telefónika, kinta ne’e.

Alterasaun kalendáriu ba kandidatu Prezidente Repúblika ne’e, sei hamenus kandidatu sira-nia tempu ba hala’o atividade kampaña, nune’e sira bele muda atividade kampaña iha loron seluk.

“Bainhira sira altera tiha entaun sira-nia tempu ba kampaña mak menus ona maibé ida-ne’e di’ak hela, tanba ita-nia kandidatu balun hakarak hili mak ba misa no fó onra ba veteranu no éroi sira duké hala’o kampaña,” nia dehan.

Kandidatura Prezidente Repúblika na’in-16 ne’ebé admitidu mak hanesan kandidatu hosi partidu CNRT José Manuel Ramos Horta, partidu KHUNTO Armanda Berta dos Santos, partidu FRETILIN Francisco Guterres Lú Olo, hosi PD Mariano ‘Assanami’ Sabino Lopes, Partidu Demokrátiku da Repúblika de Timor (PDRT) Anacleto Bento Ferreira.

Kandidatu independente sira kompostu hosi Felizberto Araújo Duarte, Maria Helena Lopes de Jesus ‘Milena’ Pires, Maria Ángela Freitas da Silva, Isabel da Costa Ferreira, Hermes da Rosa Correia Barros, Tito da Costa Cristovão ‘Lere Anan Timur’, Rogério Tiago de Fátima Lobato, Virgílio da Silva Guterres’ Lamukan’, Constâncio da Conceição Pinto ” Terus”, Antero Benedito da Silva no Martinho Germano da Silva Gusmão.

Votasaun no apuramentu rezultadu Loron eleisaun iha 19 marsu 2022 no hafoin prosesu votasaun termina inisíu kontajen votu iha sentru votasaun no envia urna ba apuramentu munisipál.

Apuramentu munisipál ba rezultadu no envia akta eleitorál no elementu (votu nulu, protestadu no reklamasaun ne’ebé existe) ba CNE iha 19 to’o 21 marsu 2022.

Apuramentu finál rezultadu nasionál CNE iha 22-24 abril 2022. Interpozisaun rekursu ba rezultadu nasionál provizóriu ba Tribunál Rekursu iha 28 abríl no Tribunál Rekursu (TR ) deside rekursu iha 29 abríl 2022 .

Maibé, iha loron 29 abríl, CNE remete (haruka) akta rezultadu ba Tribunál Rekursu bainhira laiha rekursu.

Notísia Relevante: Eleisaun ba Prezidente Repúblika sei akontese iha 19 marsu 2022

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here