Eletrisista sira halo hela normalizasaun kabu média tensaun ne'ebe hetan estragu hosi mota Nunura. Imajen Tatoli/Sérgio da Cruz.

BOBOBNARO, 03 marsu 2022 (TATOLI) – Eletrisidade Timor-Leste, Empreza Públika (EDTL, E.P) Munisípiu Bobonaro, kontinua esforsu hodi fornese eletrisidade ba komunidade Balibo no Atabae tanba mate durante semana ida ona.

Koordenadór Eletrisidade Timor-Leste, Empreza Públika (EDTL, E.P) Munisípiu Bobonaro, Francisco Laca Mali Lopes, fó-sai katak hahú orsida kalan sei fornese enérjia eletrisidade ba komunidade sira iha liña fronteira postu administrativu Balibo no Atabae.

Durante loron lima ona eletrisidade iha postu administrativu Balibo no Atabae labele lakan, tanba akontese udan-boot iha loron 26 fulan-fevereiru, rezulta mota Nunura, ne’ebé lokaliza baliza entre iha suku Tapo-Memo, postu administrativu Maliana ho suku Leolima, postu administrativu Balibo hamonu no lori lakon postu eletrisidade média tensaun hamutuk 10 no hakotu kabu média tensaun ne’ebé iha ligasaun enérjia.

“Durante loron hirak ne’e ami esforsu maibé mota la fó fatin, depois horisehik ami hasa’e fiu ida-ne’e atu halo ahi lakan ba mós ami ta’uk, mota ne’e ami koko la ba tanba korrente mota maka’as liu. Ami hein bee menus ona foin rasta fiu ba tutan iha sorin, lokraik mak ami haree prosesu oinsá entaun kalan ahi bele lakan fali ona,” nia informa ba jornalista sira, iha Nunura, kinta ne’e.

Komunidade Balibo, Osorio Magno, hafoin rona informasaun ne’e senti kontente no agradese ba tékniku EDTL, E.P tanba maske hasoru difikuldade oinoin maibe konsege rezolve ona sira-nia preukupasaun.

“Durante ami toman tiha ona eletrisidade, derrepente de’it eeletisidade mte ne’e ami sente araska loos, tanba iha nakukun laran de’it,” nia katak.

Entretantu komunidade postu administrativu Balibo ne’ebé asesu enérjia eletrsidade kompostu hosi suku Leolima, Leohitu, Balibo Vila, Cowa, Batugade no Sanirin no postu administrativu Atabae iha suku Aidabaleten, Rairobo, Atabae no Hataz.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here