Diretór CNE RAEOA, Tomas Oqui Meta. Imajen Tatoli/Abílio Elo Nini.

OÉ-CUSSE, 03 marsu 2022 (TATOLI) – Komisaun Nasionál Eleisaun (CNE, sigla portugés) Rejiaun Administrativa Espesiál Oé-Cusse Ambeno (RAEOA) deteta labarik barak partisipa kampaña dahuluk iha rejiaun ne’e.

Diretór CNE RAEOA, Tomas Oqui Meta, fó-sai katak, labarik barak partisipa iha kampaña, tuir loloos labele, tanba-lei la fó dalan maibé ne’e la’os ekipa kandidatu sira mak mobiliza labarik sira.

“Inan-aman sira mak presiza tau atensaun ba oan-sira, tanba tuir lei bandu, tanba iha kampaña liafuan balu hosi kandidatu-sra la merese atu ko’alia sai iha públiku, tanba fó impaktu ba labarik sira, ne’ebé horisehik ami haree labarik barak mak partisipa, maibé ida-ne’e ami observa la’os ekipa susesu kandidatura-sira mak organiza-sira atu ba, maibé sira ba ho vontade rasik,” Diretór CNE RAEOA informa ba Agência TATOLI, iha Sikluli Oé-Cusse, kinta ne’e.

CNE deteta labarik barak partisipa iha kampaña kandidatu Franciscco Guterres ‘Lú Olo’ nian.

Daudaun ne’e CNE desloka ona ofisiál supervizaun hamutuk na’in-88 sirkula iha sub-rejiaun haat; Oésilo, Pásabe, Nítibe no Pante Makasar atu halo supervizaun, tanba kandidatu barak maka halo konsolidasaun iha fatin hotu-hotu.

Maske nune’e iha loron dahuluk kampaña eleitorál, CNE RAEOA la deteta irregularidade, maibé la’o tuir rekizitu kampaña eleitorál.

Kandidatu Francisco Guterres ‘Lú Olo’ no Virgílio Guterres ‘Lamukan’ hala’o abertura iha RAEOA iha kampaña loron dahuluk.

“Observasaun CNE katak, kandidatu rua ne’e hala’o kampaña laiha naksalak ruma no tuir oras ne’ebé determina ona, ne’ebé ekipa CNE la rejista irregularidade ruma iha prosesu kampaña loron primeiru ne’e,” nia katak.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here