Pároku Ave Maria Suai, Sebastião Eugénio da Cruz Correia. Imajen Tatoli /Celestina Teles.

COVALIMA, 02 marsu 2022 (TATOLI)–Pároku Igreja Ave Maria Suai, Sebastião Eugénio da Cruz Correia, husu ba estudante sira labele partisipa iha kampaña eleitorál iha tempu eskola, nune’e labele abandona prosesu aprendizajen.

“Ha’u husu  ba estudante sira keta  abandona imi-nia eskola. Imi eskola, la’ós imi atu ba hakilar ‘viva’. Favór bo’ot ida tanba imi sei eskola. Ha’u fó sai avizu ne’e tanba foin lalais ami hala’o enkontru ho Bispu Dioseze Maliana, Don Noberto do Amaral, husu atu kria estabilidade durante realiza kampaña eleitorál ne’e,” Pe. Sebastião Eugénio hato’o mensajen ne’e hafoin prezide misa Kuarta-Feira Sinzas, iha Igreja Ave Maria Suai, kuarta ne’e.

Iha ámbitu kampaña eleitorál, nia husu, inan-aman sira labele husik oan sira partisipa iha kampaña tanba dala-ruma labarik ki’ik sira mós partisipa no sai vítima, nune’e husu ba inan-aman sira haree didi’ak no kuidadu labarik sira atu labele hamosu problema.

“Joven, katuas-ferik no inan-sira aman labele husik oan sira tuir kampaña. Dala ruma oan sira kiik mós partisipa iha kampaña, haree didi’ak no kuidadu ita-nia oan sira. Grupu no membru partidu hotu atu labele abuza malu hodi hamosu problema,” nia dehan.

Pároku ne’e husu ba militante no apoiante sira hosi kandidatura Prezidente Repúblika períodu 2022-2027 nian, bainhira realiza kampaña tenke kumpre regra sira hanesan uza kapasete no labele provoka malu hodi hamosu problema.

Oras ne’e daudaun kandidatura sira hahú halo ona kampaña, maibé husu ba sarani sira bainhira ba vota ne’e tenke uza konxiénsia no vota haree tuir programa sira-ne’ebé mak kandidatura sira hato’o hodi halo dezenvolvimentu ba rai ida-ne’e.

Antes ne’e, kandidatura Prezidente Repúblika ba tinan ne’e  hamutuk na’in-16 mak hanesan Isabel da Costa Ferreira, Hermes da Rosa Correia Barros, Maria Angela Freitas da Silva, Rogerio Tiogo de Fátima Lobato, Anacleto Bento  Ferreira, Francisco Guterres Lú-Olo, Maria Helena Lopes de Jesus Pires, Tito da Costa Cristovão, Armanda Berta dos Santos, Antero Benedito da Silva, Constancio da Conceição Pinto, Virgilio da Silva Guterres, Martinho Germano da Silva Gusmão, José Manuel Ramos Horta, Felizberto Araujo Duarte no Mariano Assanami Sabino Lopes.

Bazea ba kalendária ne’ebé mak aprova hosi Komiasaun Nasionál (CNE -Silga Portugés) ne’ebé aprova ona katak kandidatura Prezidente Repúblika periodu 2022-2027 ne’e hahú realiza ona kampaña eleitorál iha 02 marsu to’o remata iha loron 16 fulan-marsu tinan 2022.

Notísia Relevante: Uma-kreda ‘bandu’ Kandidatu PR uza símbolu-atributu igreja iha kampaña

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here