Ministu Turizmu Komérsiu no Indústria (MTKI), José Lucas do Carmo da Silva, entrega sasán apoiu umanitáriu ba Diretór Sentru Formasaun Don Bosco, Irmaun Adriano Maria de Jesus. Imajen/Espesiál

DILI, 02 marsu 2022 (TATOLI)—Ministru Turizmu Komérsiu no Indústria (MTKI), José Lucas do Carmo da Silva, hamutuk ho ekipa, kuarta ne’e, hola inisiativa fó apoiu umanitáriu ba vítima dezastre naturál hamutuk ema na’in-268 hosi uma-kain 66, ne’ebé evakua ba iha Don Bosco, Comoro.

Vítima hirak ne’e afetadu inundasaun ne’ebé akontese iha loron 21 fevereiru 2022, ne’ebé maioria hela besik mota iha área Comoro.

“Apoiu umanitáriu hanesan foos no mie sedaap, ami fornese hanesan asaun karidade ida hosi ami ba imi, tanba bainhira ita-boot sira evakua mai fatin ne’e, ami mós hetan kontaktu hosi Autoridade Munisípiu Dili, entaun ami mai halo asaun solidaridade atu hakma’an de’it susar ne’ebé imi hasoru,” Ministru José Lucas, hateten Don Bosco, Comoro.

Notísia relevante: CLN apoiu foos saka 200 ba vítima inundasaun iha Don Bosco

Biban ne’e, governnate ne’e husu ba vítima inundasaun sira, bainhira sai hosi fatin akollimentu ne’e, labele kontinua hela fali iha fatin risku.

Iha fatin hanesan, Sekretariadu Prezidente Autoridade munisípiu Dili, Antonio Moniz Clau, husu ba vítima sira atu iha konsiénsia hodi hadook-an hosi fatin risku sira.

Nune’e mós, Sekretáriu Estadu Protesaun Sivil, Joaquim Gusmão, husu ba komunidade atu atensaun nafatin iha fulan hirak ne’e nia-laran, tanba bele akontese udan-boot, bazeia ba previzaun meteorolojia hosi Diresaun Nasional Meteorolojía no Jeofízika Timor-Leste.

Diretór Sentru Formasaun Don Bosco, Irmaun Adriano Maria de Jesus, hateten, Sentru Formasaun Don Bosco sempre loke odamatan ba ema hirak ne’ebé afetadu dezastre naturál.

Daudaun ne’e, iha uma-kain hamutuk 45 mak deside atu fila hikas ona ba sira-nia hela fatin.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here