Ilustrasaun projetu CCS. Imajen/Espesiál

DILI, 02 marsu 2022 (TATOLI)–Organizasaun Naun Governamentál (ONG), La’o Hamutuk konsidera desizaun empreza petróleu no gás australianu, Santos Limited, atu implementa projetu kaptura no rai karbonu ka Carbon Capture and Storage (CCS) iha kampu Bayu-undan ne’e la’ós solusaun ba emisaun net zero.

“Santos rasik halo ona promesa atu atinje emisaun net zero iha tinan 2040, signifika katak sira presiza buka meiu atu kansela emisaun liuhosi hala’o atividade hanesan CCS. Infelizmente, konseitu emisaun net zero, signifika katak empreza sira bele kontinua nafatin atu kria emisaun perigozu no hahú projetu mina no gás foun, maski péritu barak agora konklui katak mundu labele loke projetu mina no gás ida tan, bainhira hakarak proteje klima,” refere nota Agência TATOLI asesu, kuarta ne’e.

Notísia relevante: Projetu CCS sai alternativa bainhira mina iha kampu Bayu-undan maran

Empreza Santos daudaun ne’e sai operadór iha kampu Bayu-undan, ne’ebé hakarak atu realiza projetu CCS iha kampu, bainhira laiha ona produsaun petrolífera tuir previzaun iha tinan 2023 ka 2024.

“Ne’e la’os solusaun no la onestu, signifika katak gás no diósidu karbonu (CO2) ne’ebé sai ona hanesan emisaun ka lixu hosi produsaun gás naturál, sei hatama ka rai iha tasi okos iha tasi Timor-Leste nian,” esplika nota hosi La’o Hamutuk.

ONG ne’e nota mós katak, projetu CCS ne’ebé sei implementa hosi Santos ninia intensaun loloos atu uza fatin mamuk Bayu-undan ba rai CO2 hosi projetu gás Barossa iha territóriu Austrália, ne’ebé sei lori gás ba Planta Darwin Liquefied Natural Gas (LNG) no rai fali karbonu iha kampu Bayu-undan.

Nune’e, La’o Hamutuk konsidera laiha benefísiu ida mai Timor-Leste hosi gás Barossa, maibé Santos hein Timor-Leste bele fornese fatin atu rai hela emisaun hosi sira-nia projetu.

“Santos hasoru hela problema boot, tanba gás naturál hosi kampu Barossa, sei emite montante karbonu a’as tebes, ne’ebé gás naturál iha kampu Barossa kahur ho nível karbonu a’as liu. Empreza bele hasoru susar atu evita emisaun ne’ebé sei prodús no atu buka dalan fa’an gás naturál ne’ebé rezulta hosi projetu ho kontribuisaun maka’as ba mudansa klimátika,” La’o Hamutuk argumenta.

Barossa mak Kampu ne’ebé seidauk dezenvolve no tuir planu atu hahú produsaun iha tinan 2025. Maibé Santos hetan presaun kona-ba kompromisu ba net zero no aumenta emisaun ba atmósfera, tanba ne’e Santos introdús planu CCS atu permite produsaun Barossa bele la’o.

Teknolojia CCS la garante kaptura emisaun tomak

Nota ne’e deskreve mós katak, realidade hatudu teknolojia CCS seidauk forte atu garante ka bele konsege duni kaptura no rai hela emisaun tomak no la bele kaptura emisaun hosi kada aspetu produsaun no transportasaun gás to’o nia utilizasaun ne’ebé susar atu kontrola.

“Tuir kalkulasaun, projetu kaptura no rai hela karbonu iha Bayu-undan bele konsege hamenus 28% hosi emisaun totál hosi produsaun gás Barossa.  CCS la’ós solusaun efetivu ka justu, solusaun efetivu no justu liu mak la prodús projetu petrolíferu no gás foun hodi prevene prodús emisaun hosi kampu no hosi konsumidór sira hodi salva ita-nia planeta hosi risku grave iha tinan tuir mai,” refere nota komunikadu.

Iha setembru 2021, Santos ho Autoridade Nasional Petróleu no Minerál (ANPM) asina nota entendimentu ida atu hahú diskute posibilidade atu uza kampu Bayu-undan ba rai hela karbonu.

Notísia relevante: ANPM-Santos asina entendimentu kaptura no armazena karbonu iha Bayu-undan

ONG ne’e haree katak entendimentu ne’e nu’udar etapa dahuluk ne’ebé seidauk iha forsa legál atu avansa projetu CCS, enkuantu Santos dadaun ne’e iha hela esforsu nia-laran atu hasai issu ambientál ba projetu ne’e liuhosi Northern Territory atu fornese lisensiamentu ambientál ba sira hodi uza kampu Bayu-undan ne’ebé tama iha territóriu soberanu Timor-Leste, ne’ebé reflete iha proposta Santos ba Autoridade Protesaun Ambientál Northern Territóriu, Austrália.

Aleinde ne’e, La’o Hamutuk preokupa ba asuntu iha sorumutu entre Primeiru-Ministru Timor-Leste no Austrália, ne’ebé sita kona-ba hametin kooperasaun di’ak ba dezenvolvimentu komérsiu gás inklui mós intensaun atu koopera ba utilizasaun rai ka armazena karbonu.

Nune’e, ONG ne’e hein katak Governu bele tetu molok foti risku boot no fiar katak Governu la aseita lalais ba pedidu empreza harii CCS no dezenvolve Barossa, maibé presiza ho prudente atu sukat ba kondisaun iha aspetu barak, tantu lokál no mundiál hodi la aumenta tan volume ba krize ambientál.

“Ezemplu mak iha marsu 2020 no abríl 2021, Timor-Leste enfrenta kalamidade boot ne’ebé hamate ema 40 no ema 15.000 afetadu, lakon hela fatin no riku-soin. Impaktu hosi mudansa klimátika mosu beibeik ona iha ita-nia realidade, hahú hosi udan been la tuir nia-tempu, udan boot, bailoron naruk ne’ebé halo rai maran, bee maran hodi provoka hamlaha no kiak ba populasaun,” nota komunikadu deskreve.

Ba kestaun ne’e, La’o Hamutuk konvida parte hotu haree ba asuntu mudansa klimátika ho kle’an liu, hahú hosi fatór dominante sira ne’ebé kontribui boot liu, tanba esforsu globál atu hapara atividade produsaun iha indústria estrativa nu’udár solusaun justu liu atu ajuda planeta bele fila ba estabilidade no hakmatek hanesan antes.

“Hanoin katak oportunidade forte no sustentável liu mak investe ba ita-nia ema no indústria transformadór sira ne’ebé sempre renovável, do que haree beibeik ba indústria mina no gás ne’ebé la barak, la sustentável no halo fo’er ita-nia atmósfera no klima global,” refere nota.

Daudaun ne’e, empreza Santos halo hela atividade perfurasaun iha posu tolu iha kampu Bayu-undan ho investimentu millaun $235.

Antes ne’e, Prezidente ANPM, Florentino Soares Ferreira, esplika, razaun aseita ho projetu CCS tanba ANPM haree ba mudansa globál, ne’ebé kuaze país ho produsaun mina boot iha mundu halo tranzisaun enerjétika ho hanoin atu redús emisaun C02 iha atmósferu no fó reseita ba Estadu.

Iha kampu gás lubuk ida iha Austrália ne’ebé ho kompozisaun C02 boot tebes no kampu sira presiza tratamentu ba C02, entaun tanba Austrália lakohi atu halo emisaun maka’as, tanba ne’e Timor-Leste fó alternativa ida hodi halo injesaun iha Bayu-undan tanba ninia rezervatóriu di’ak.

Santos hanesan operadór ba Bayu-undan sei haree hamutuk ho ANPM kona-ba kualidade rezervatóriu kampu petrolífera hodi rai CO2 no explora enkuadramentu tékniku no komersiál ba projetu CCS ne’e rasik.

CCS hanesan teknolojia atu kaptura no armazena karbonu iha rai-laran, ne’ebé konsidera hanesan esforsu ne’ebé halo atu halo redusaun emisaun CO2 iha atmosferu no hosi kampu gás balun ne’ebé iha kontíudu CO2 barak tebes.

Inisiativa ne’e nu’udar esforsu ne’ebé ANPM halo atu kontinua fó sustentabilidade ba reseita hosi indústria petrolífera no integra Timor-Leste iha redusaun CO2 iha mundu, maski hanesan país kiik.

Santos atualmente iha partisipasaun 43,4% hanesan operadór iha kampu Bayu-undan, SK E&S (25%), INPEX (11,4%), ENI (11%), JERA (6,1%), Tokyo Gas (3,1).

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here