Sekretáriu Jerál CMCLN Baucau, Manuel Alari da Costa Soares. Imajen Tatoli/Natalino Belo.

BAUCAU, 02 marsu 2022 (TATOLI) – Konsellu Kombatente Libertasaun Nasionál (CMCLN, sigla portugés) Munisípiu Baucau, apela ba komunidade iha Baucau hasa’e bandeira nasionál durante loron-hitu hodi selebra loron veteran ne’ebé monu iha loron 3 marsu.

Sekretáriu Jerál CMCLN Baucau, Manuel Alari da Costa Soares, esplika, sentidu hosi hasa’e bandeira tanba atu fó onra no gloria ba eroi nasionál tanba loron 3 marsu 1981 sai fatór determinante ba prosesu luta libertasaun nasionál.

“Husu ba povu no veteranu hotu-hotu atu hasa’e bandeira nasionál iha loron 3 marsu (aban) iha uma oin durante loron-hitu to’o loron 9 marsu mak hatún,” Sekretáriu Jerál Veteranu Munisípiu Baucau, ko’alia iha Vila Antiga, kuarta ne’e.

Alari esplika, loron 3 marsu 1981 sai determinante hafoin realiza konferensia Maubai hodi hamosu estratéjia funu katak hotu-hotu submete ba oreintasaun komandu luta hodi organiza funu hasoru okupasaun Indonézia to’o hetan independénsia.

“Hasa’e bandeira loron-hitu hanesan fó onra ba eroi sira tanba ita lakon aswain barak no husik hela inan, feton no oan kiak barak iha independénsia ne’e,” Alari akresenta.

Alari hateten, liuhosi loron nasionál veteranu husu ba juventude sira atu banati tuir dalan luta eroi no veteranu sira nian katak tenke kaer metin unidade nasionál atubele luta hasoru kiak no mukit iha Timor-Leste.

Nia husu veteranu sira labele haketak malu tanba de’it partidu polítiku no interese pesoál maibé nafatin solidu hanesan rezultadu konferénsia Maubai iha tinan 1981 atu nune’e kontinua kontribui ba libertasaun povu.

Antes ne’e CMCLN Baucau hato’o proposta ba nasionál liuhosi SekretAria Estadu ba Asuntu Kombatente Libertasaun Nasionál (SEAKLN), maibé senti triste tanba ikus mai iha loron inportante refere laiha komemorasaun no kansela tanba laiha orsamentu.

Proposta ne’ebé hato’o ho tótal orsamentu $ 15.000 ho atividade tolu hanesan misa, seminariu nasionál no hasa’e bandeira.

Jornalista         : Natalino Belo

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here