Komuniddade ne’ebé hela iha mota-ninin no mota-laran área Comoro nia uma hetan estragu hafoin udan boot iha foho Kasnafar, Aileu no Ermera halo bee-mota tuun hodi rezulta inundasaun, sesta (25/2/2022). Imajen TATOLI/António Dasiparu.

DILI, 02 marsu 2022 (TATOLI)—Governu liuhosi Autoridade Munisípiu Dili (AMD), Sekretária Estadu Protesaun Sivíl (SEPS), Ministériu Turizmu Komérsiu no Indústria (MTCI) hamutuk ho Centro Formação Don Bosco Comoro, tersa (02/02) ne’e, re-intregra ona vítima inundasaun uma kain 45 ba sira-nia hela fatin.

Notísia Relevante: Governu evakua ona vítima inundasaun 57 ba sentru akollimentu Don Bosco

“Ita-nia vítima inundasaun mota Comoro ne’ebé hela iha Don Bosco, horisehik ita re-integra ona familia hamutuk 45 ba sira-nia hela fatin orijinál, tanba sira la tama iha kategória uma estragu maibé tama kategória hela iha fatin risku,” Adjuntu Prezidente Autoridade Munisípiu Dili, António Moniz Calau, hateten ba Agência Tatoli, via telefónika, kuarta ne’e.

Totál familia ne’ebé hela iha área risku mota Comoro hamutuk 125, hosi númeru ne’e familia hamutuk 65 mak Governu dezloka ba Don Bosco Comoro no entre família 65 ne’e iha uma haat (4) mak aat todan, tolu (3) aat naton no uma neen (6) aat kmaan.

Komuniddade ne’ebé hela iha mota-ninin no mota-laran área Comoro kontinua sofre inundasaun hafoin udan boot iha foho Kasnafar no Aileu, segunda (21/2/2022). Imajen TATOLI/António Dasiparu.

“Agora sira seluk, ita fó ona apoia ai-han no la’ós ai-han ba sira atu sira fila ona. Enkuantu, ba sira ne’ebé uma aat, ita fó opsaun rua mak sira fila ba sira-nia munisípiu no opsaun seluk sira hela iha Díli laran maibé labele fila-fali ba sira-nia hela fatin antérior tanba fatin ne’ebá risku ona. Hosi ne’e, protesaun sívil sei fó apoia materiál konstrusaun ba sira atu halo sira-nia uma,” nia esplika.

Ba familia ne’ebé hili opsaun hela iha Díli laran, sira mak buka rasik rai mak hafoin Governu liuhosi Sekretária Estadu Protesaun Sivíl (SEPS) apoia materiál konstrusaun ba sira atu halo sira-nia uma, maibé sira labele buka rai iha fatin risku sira.

Vítima inundasaun mota Comoro uma-kain 45 ne’e bainhira fila ba sira-nia hela fatin, sira husu Governu atu halo moru protesaun nomós tau bronjong iha mota laran, nune’e bele proteje sira hosi inundasaun.

“Maibé ami dehan la’e tanba dadaun ne’e sira hela ona iha bronjong laran, katak tuir lei ne’e hela distánsia entre mota mai ninin ne’e metru 50. Agora sira hela tama liu ba laran ona, maibé sira ezije Governu atu tau tan bronjong ida iha sira-nia uma, ne’ebé ami dehan bronjong ne’e sei la tau tanba ne’e bee-mota nia dalan,” nia dehan.

Jornalista  : Nelia Fernandes

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here