Diretór CNE Baucau, Esmeraldo Damião Belo. Imajen Tatoli/Natalino Belo.

BAUCAU, 02 marsu 2022 ( TATOLI) – Komisaun Nasionál Eleisaun (CNE, sigla portugés) dezloka ona ofisiál supervizaun na’in-154 ba postu administrativu iha munisípiu Baucau.

Diretór CNE Baucau, Esmeraldo Damião Belo, hateten, ofisiál supervizaun hamutuk na’in-154 dezloka ona ba kada postu administrativu neen iha munisípiu Baucau atu akonpaña prosesu formasaun ba brigadista inklui preparasaun antes eleisaun prezidensiál.

“Ita-nia ofisiál sira tenke ba atu halo supervizaun ba sira-nia prosesu formasaun nune’e másimu iha eleisaun prezidensíal mai,” Diretór CNE Baucau ko’alia iha Vila Nova, kuarta ne’e.

CNE mos hato’o karta koñesementu ba administradór postu administrativu neen kompostu Baguia, Laga, Quelicai, Venilale, Vemase no Baucau Vila nune’e bele fó atensaun no tau matan durante hala’o kna’ar iha baze.

Kna’ar inportante hosi ofisiál supervizaun CNE mak atu akompaña rekrutamentu hosi Sekretária Tekniku Administrasaun Eleitóral (STAE) brigadista sira ba polling staf iha kada sentru votasaun hamutuk 125 no prosesu formasaun ba fiskál sira.

Nune’e mós  identifika sentru no estasaun votasaun liuliu kondisaun fatin, infraestrutura nune’e bainhira materiál sensitivu no naun-sensitivu distribui ba tereñu iha kondisaun seguru.

CNE Baucau mós distribui ona oráriu kampaña ba institusaun relevante sira hanesan Provedoria Direitu Umanu no Justisa (PDHJ), Polísia Nasionál Timor-Leste (PNTL) no obeservadór sira nune’e hamutuk akompaña durante prosesu kampaña eleisaun prezidensiál iha Baucau.

Jornalista   : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here