Osan Dolar Amérika. Imajen/Espesiál

OÉ-CUSSE, 01 marsu 2022 (TATOLI) – Diretór Diresaun Rejionál Edukasaun Juventude no Desportu iha Rejiaun Administrativa Espesiál Oé-Cusse Ambeno (RAEOA), Daniel Mauno, fó-sai katak, programa merenda eskolár ba seidauk implementa tanba sei hein alokasaun orsamentu hosi autoridade.

“Tuir planu asaun anuál RAEOA, programa merenda eskolár iha tinan fiskál 2022 ita orsamenta nafatin ba tinan ida nian, maibé ninia implementasaun neste mumentu ita tama ona fulan-marsu, entaun loron efetivu balun liu ona maibé seidauk realiza, tanba orsamentu seidauk aloka mai, entaun tarde liu ona atu ezekuta iha inísiu tinan ne’e, Daniel Mauno, informa ba Agência Tatoli iha Santa Rosa Oé-Cusse.

Nune’e parte edukasuan sei kontinua hein, bainhira aloka ona maka foin anunsia ba eskola-sira, mai ho sira-nia planu ezekusaun iha eskola, tanba proposta ba administrasaun nian parte edukasaun submete ona iha Sekretária Rejionál Asuntu Edukasaun Solidariedade Sosiál no Inkluzaun.

“Iha inísiu fevereiru proposta ita submete ona hanesan osan ho montante boot tanba inklui ho osan konsensoen ba tinan ida nian, no foos, mezmu to’o ohin foos seidauk iha, maibé planu tau nafatin ba programa ne’e, tán ne’e mak prosesu atu implementa tarde,” nia katak.

Tuir estandarizaun hosi Ministériu Edukasaun, Juventude no Desportu (MEJD) katak, realizasaun programa merenda eskolár, kada alunu sei hetan sentavu $0,25, ne’ebé implementa iha Eskola Ensinu Báziku no eskola pré-eskolár.

Nune’e totál Eskola Ensinu Báziku iha Rejiaun Administrativa Espesiál Oé-Cusse Ambeno hamutuk unidade 71 no eskola pré-eskolár hamutuk unidade 14.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here