Pekuária RAEOA vasina ona karau Timor 819 hodi hasa'e komunidade hodi prevene moras. Imajen mídia departementu pekuária.

OÉ-CUSSE, 01 marsu 2022 (TATOLI) –  Diresaun Rejionál Agrikultura liuhosi Departamentu Pekuária halo ona vasinasaun ba karau Timor hamutuk 819 iha Rejiaun Administrativa Espesiál Oé-Cusse Ambeno (RAEOA), hodi hasa’e imunidade atu prevene  moras.

Xefe Departamentu Pekuária, Cipriano Agustinho Daos, hatete, objetivu hosi vasina ne’e atu prevene peste karau no hasa’e imunidade ba animál sira tanba iha tempu udan hahán no hemu di’ak maibé akontese bailoron naruk komesa menus hahán no hemu, nune’e presiza prevene antes liuhosi vasinasaun.

“Atividade ne’ebé ami hala’o hosi janeiru to’o fevereiru, dadus iha departementu pekuária, simu lista mai hosi agrikultórsira hamutuk karau 1.119 no daudaun ne’e ita konsege vasina ona karau 819 envolve uma-kain 110, seidauk simu vasina hamutuk 300, ne’ebé halai liubá animál boot,” Cipriano Agustinho Daos, informa ba Agência Tatoli iha Oé-Cusse, tersa ne’e.

Nia informa, atividade vasinasaun ne’e fahe ba ekipa haat, ekipa ida dezloka ba iha sub-rejiaun Pante Makasar realiza iha suku Nípani, ekipa ida realiza iha sub-rejiaun Nítibe iha suku Usitaco.

Nune’e mós iha sub-rejiaun Pásabe realiza iha suku Malelat no iha sub-rejiaun Oésilo realiza iha suku Usitaqueno, tanba antes abríl karau sira tenke vasina hotu iha suku 18, tanba ta’uk to’o iha fulan-maiu mudansa klimátika udan ba bailoron sei la vasina.

Xefe departamentu ne’e relata, vasinasaun ne’ebé ekipa pekuária uza iha rejiaun ne’e maka Hemorrhagic Septicaemia Epizootica ka peste karau atu prevene bateria iha karau nian, sempre halo vasinasaun kada tinan dala ida.

“Maibé vasina ba fahi nia ai-moruk seidauk mai, tán ne’e maka iha tinan hirak liubá akontese moras fahi, maioria mate. Ho dadus ne’e ita rekolla hosi 2010 iha Oé-Cusse hamutuk fahi 25.004, agora iha tinan ne’e parte pekuária atualiza tán, hela de’it rihun 10-resin, rihun 15 mate tanba hetan ataka hosi peste fahi klásiku,” nia relata.

Purtantu, kona-ba animál manu nian, ekipa pekuáriu vasina ho ai-moruk newcastle disease, ne’ebé realiza iha fulan-marsu, juñu, setembtu no dezembru. Ba bibi seidauk tanba ai-moruk ba virus ne’e seidauk iha, maibé nafatin halo tratamentu ho ai-moruk antibiótika no vitamina.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here