Ahu-ruin iha Tasi Timór. Imajen/Espesiál

DILI, 01 marsu 2022 (TATOLI)–Sekretaria Estadu Ambiente (SEA) liuhosi Diresaun Nasionál Biodiversidade husu ba komunidade iha territóriu tomak, liuliu iha munisípiu Dili atu hapara foti ahu-ruin iha tasi laran hodi fa’an tanba sei fó impaktu degrasaun tasi.

Diretór Nasionál Biodiversidade, Rui dos Reis Pires, hateten, parte diresaun kolabora ona ho Ministériu Agrikultura no Peska (MAP) no Sekretáriu Estadu Peska (SEP) desde tinan 2021, atu halo sosializasaun ba komunidade atu labele foti ahu-ruin sira iha tasi-laran.

“Ita haree hanesan iha Dili, iha tasi-ibun Bidau no fatin seluk, komunidade kontinua fa’an ahu-ruin. Tanba ne’e, ba oin bainhira ita koko halo sosializasaun tan mak komunidade kontinua fa’an, ita sei tama ho lei atubele hapara sira, tanba rekursu sira ne’ebé eziste iha rai ne’e Governu mak iha kompeténsia tomak atu jere no hadi’a ba ema hotu nia bem estár,” Diretór hateten ba Agência TATOLI, iha ninia knaar fatin, Bebora, tersa ne’e.

Tuir artigu 6 alíne F Konstituisaun, hateten katak proteje didi’ak meiu ambiente no bali nafatin riku-soin rai nian.

Nune’e mós, iha dekretu-lei númeru 6/2020 ne’ebé ko’alia kona-ba estabelese rejime legál hodi fó protesaun no konservasaun ba biodiversidade no iha kódigu penál Timor-Leste, iha artigu 217 ne’ebé ko’alia kona-ba krime hasoru biodiversidade.

“Ho lei sira ne’e, ema ne’ebé estraga ahu-ruin sei hetan sansaun no tama kadeia hahú tinan tolu to’o lima, sé ema ne’ebé estraga ahu-ruin selu multa ho osan hahú $3.000 to’o 5.000 no bainhira envolve koletivu ka empreza ruma multa hahú $10.000-$50.000,” nia akresenta.

Tanba ne’e, Diretór ne’e husu komunidade atu hapara foti ahu-ruin iha tasi tanba sei fó impaktu ba biodiversidade tasi laran.

“Foti ahu-ruin aleinde fó impaktu ba degradasaun, bele fó impaktu mós ba ikan tanba ita hatene katak ahu-ruin ne’e mós sai fatin ba ikan buka hahán, no sai fatin mós ba ikan halo reprodusaun,” nia tenik.

Diretór ne’e dehan, bainhira komunidade la estraga ahu-ruin, automátikamente fó impaktu ba produsaun ikan iha rai-laran, tanba ne’e ahu-ruin importante tebes aleinde nia proteje área kosteira sira hosi laloran, nia funsaun seluk mós sai fatin ka habitat ba ikan kiik-oan sira no fornese mós hahán ba ikan sira iha tasi-laran.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here